റിയാദ്: പുതുപള്ളി എംഎല്എയും കോണ്ഗ്രസ് യുവ നേതാവുമായ ചാണ്ടി ഉമ്മന് ഇന്ന് രാത്രി റിയാദിലെത്തും. ഒഐസിസി റിയാദ് സെന്ട്രല് കമ്മിറ്റി സംഘടിപ്പിക്കുന്ന ഉമ്മന് ചാണ്ടിയുടെ രണ്ടാം ചരമവാര്ഷിക അനുസ്മരണത്തില് പങ്കെടുക്കുവാനാണ് അദ്ദേഹം റിയാദില് എത്തുന്നത്. പരിപാടിയുടെ ഭാഗമായി നാളെ ബത്ഹ ഡി പാലസ് ഓഡിറ്റോറിയത്തില് സെന്ട്രല് കമ്മിറ്റി സംഘടിപ്പിക്കുന്ന 'കുഞ്ഞൂഞ്ഞോര്മ്മയില്' അനുസ്മരണ പരിപാടിയില് മുഖ്യാതിഥിയായി പങ്കെടുത്ത് അദ്ദേഹം സംസാരിക്കും. ചടങ്ങില് റിയാദിലെ രാഷ്ട്രീയ സാംസ്കാരിക രംഗത്തെ പ്രമുഖരും സംബന്ധിച്ച് സംസാരിക്കും.
പരിപാടിയുടെ ഭാഗമായി വൈകിട്ട് 05 മണി മുതല് പൊതുജനങ്ങള്ക്കായി കാരിക്കേച്ചര് മത്സരം നടക്കും. അതോടൊപ്പം ജീവകാരുണ്യ രംഗത്ത് നാട്ടിലെ ഏറ്റവും മികവ് തെളീയിച്ച ജനപ്രതിനിധിക്ക് ഉമ്മന് ചാണ്ടിയുടെ പേരില് റിയാദ് ഒഐസിസി ഏര്പ്പെടുത്തിയ 'ഉമ്മന് ചാണ്ടി സ്മൃതി പുരസ്ക്കാര' ജേതാവിനെ ചാണ്ടി ഉമ്മന് ചടങ്ങില് പ്രഖ്യാപിക്കും. കൂടാതെ കഴിഞ്ഞ ദിവസങ്ങളിലായി നടന്ന പ്രസംഗ മത്സരത്തിലെ വിജയികള്ക്കുള്ള സമ്മാനങ്ങളും ചടങ്ങില് വിതരണം ചെയ്യും. പരിപാടിയിലേക്ക് എല്ലാവരേയും ക്ഷണിക്കുകയും സ്വാഗതം ചെയ്യുന്നതായും സംഘാടകര് അറീയിച്ചു.
Related News
