അബുദാബി: ഡിജിറ്റല് ബാങ്കിംഗ് സുരക്ഷ ശക്തിപ്പെടുത്താന് ലക്ഷ്യമിട്ട് പ്രധാനപെട്ട മാറ്റങ്ങള് അവതരിപ്പിച്ച് യുഎഇ ബാങ്കുകള്. നാളെ (ജൂലൈ 25 വെള്ളിയാഴ്ച) മുതല് യുഎഇയിലെ ബാങ്കുകള് എസ്എംഎസും ഇമെയിലും വഴി അയയ്ക്കുന്ന ഒറ്റത്തവണ പാസ്വേഡുകള് (ഒടിപികള്) ഘട്ടംഘട്ടമായി നിര്ത്തലാക്കാന് തുടങ്ങും.
യുഎഇ സെന്ട്രല് ബാങ്കിന്റെ പുതിയ മാര്ഗ്ഗനിര്ദ്ദേശം പ്രകാരം, എല്ലാ ബാങ്കുകളും ആഭ്യന്തര, അന്തര്ദേശീയ സാമ്പത്തിക ഇടപാടുകള്ക്കായി ഉപഭോക്താക്കളെ ആപ്പ് അധിഷ്ഠിത വ്യക്തിത്വ നിര്ണയത്തിലേക്ക് (authentication) മാറ്റണം.
സിം സ്വാപ്പിംഗ്, ഫിഷിംഗ് പോലുള്ള തട്ടിപ്പുകള് നടത്താന് സൈബര് കുറ്റവാളികള് കൂടുതലായി ലക്ഷ്യമിടുന്ന എസ്എംഎസ്, ഇമെയില് ഒടിപികളെ ദീര്ഘകാലമായി ആശ്രയിക്കുന്ന രീതികളില് നിന്നുള്ള ഒരു പ്രധാന മാറ്റമാണ് ഈ നീക്കം.
2026 മാര്ച്ചോടെ എസ്എംഎസും ഇമെയിലും വഴിയുള്ള ഒടിപികള് പൂര്ണ്ണമായും നിര്ത്തലാക്കുന്ന രീതിയില് ക്രമേണയായിരിക്കും മാറ്റം അവതരിപ്പിക്കുക. പകരം, ബാങ്ക് മൊബൈല് ആപ്പുകള് വഴി സുരക്ഷിതവും അപകടസാധ്യത അടിസ്ഥാനമാക്കിയുള്ളതുമായ സാങ്കേതികവിദ്യകള് വഴി ഉപഭോക്താക്കളുടെ ഇടപാടുകളുടെ വിശ്വാസ്യത നിര്ണയിക്കും.
Related News
