അമരാവതി: മഹാരാഷ്ട്രയിലെ അമരാവതി നഗരത്തില് 10 വയസ്സുകാരിയുടെ ആമാശയത്തില് നിന്ന് ശസ്ത്രക്രിയയിലൂടെ അര കിലോ വരുന്ന മുടിക്കെട്ട് നീക്കം ചെയ്തു. ദഹന സംബന്ധമായ പ്രശ്നങ്ങളെക്കുറിച്ച് കുട്ടി പരാതിപ്പെട്ടതിനെ തുടര്ന്നാണ് ഡോക്ടര്മാരെ കണ്ടത്.
കഴിഞ്ഞ അഞ്ചാറ് മാസമായി ഛര്ദ്ദി, വിശപ്പില്ലായ്മ, ശരീരഭാരം കുറയല് തുടങ്ങിയ പ്രശ്നങ്ങളുമായി 20 ദിവസം മുന്പാണ് കുട്ടിയെ ആശുപത്രിയില് പ്രവേശിപ്പിച്ചത്. തനിക്ക് മുടി കഴിക്കുന്ന ശീലമുണ്ടായിരുന്നു എന്ന് കുട്ടി ഡോക്ടര്മാരെ അറിയിച്ചതായി ശസ്ത്രക്രിയ നടത്തിയ ശിശുരോഗ വിദഗ്ദ്ധ ഡോ. ഉഷാ ഗജ്ബിയെ മാധ്യമപ്രവര്ത്തകരോട് പറഞ്ഞു.
മെഡിക്കല് പരിശോധനകള്ക്കും കൗണ്സിലിംഗിനും ശേഷം കുട്ടി മുടി കഴിക്കുന്ന കാര്യം ഡോക്ടര് ഗജ്ബിയെയോട് വെളിപ്പെടുത്തി. മെഡിക്കല് പരിശോധനയില് മുടിക്കെട്ട് ആമാശയത്തില് ഒരു പിണ്ഡമായി മാറിയതായി കണ്ടെത്തി. 'അവളെ ഓപ്പറേഷന് ചെയ്യാന് ഞങ്ങള് തീരുമാനിച്ചു, കുറച്ച് ദിവസങ്ങള്ക്ക് മുന്പ് നടത്തിയ ശസ്ത്രക്രിയയില് അവളുടെ ആമാശയത്തില് നിന്ന് അര കിലോയോളം മുടിക്കെട്ട് കണ്ടെത്തി,' ഡോക്ടര് പറഞ്ഞു.
മുടിക്കെട്ട് വിജയകരമായി നീക്കം ചെയ്തതായും കുട്ടിക്ക് ഇപ്പോള് കൃത്യമായി ഭക്ഷണം കഴിക്കാന് സാധിക്കുന്നുണ്ടെന്നും മറ്റ് പ്രശ്നങ്ങളൊന്നുമില്ലെന്നും ഡോ. ഗജ്ബിയെ അറിയിച്ചു. കുട്ടിയെ ഉടന് ഡിസ്ചാര്ജ് ചെയ്യുമെന്നും അവര് കൂട്ടിച്ചേര്ത്തു.
Related News
