റിയാദ്: കിഴക്കന്‍ പ്രവിശ്യയില്‍ കനത്ത ചൂടിനും പൊടിക്കാറ്റിനും സാധ്യതയുണ്ടെന്ന് സൗദി നാഷണല്‍ സെന്റര്‍ ഓഫ് മെറ്റീരിയോളജി മുന്നറിയിപ്പ് നല്‍കി. അല്‍-അഹ്‌സ, ബുഖൈഖ്, അല്‍-ഉദൈദ്, അല്‍-ഖഫ്ജി, അല്‍-നുഐരിയ, അല്‍-ഖര്‍യ അല്‍-ഉല തുടങ്ങിയ ഗവര്‍ണറേറ്റുകളില്‍ 47-48 ഡിഗ്രി സെല്‍ഷ്യസ് വരെ താപനില ഉയരും. രാവിലെ 11 മണിക്ക് ആരംഭിച്ച താപനില മുന്നറിയിപ്പ് വൈകുന്നേരം 5 മണി വരെ തുടരും.

ഇതേസമയം, കിഴക്കന്‍ പ്രവിശ്യയില്‍ ശക്തമായ പൊടിക്കാറ്റിനും സാധ്യതയുണ്ട്. ഖഫ്ജി, നുഐരിയ, ഹാഫര്‍ അല്‍-ബാതിന്‍, ഖര്‍യത് അല്‍-ഉല എന്നിവിടങ്ങളില്‍ പൊടിക്കാറ്റ് കാരണം കാഴ്ചാപരിധി 1-3 കിലോമീറ്ററായി കുറയും. ദമ്മാം, ദഹ്‌റാന്‍, ജുബൈല്‍, ഖോബാര്‍, ഖത്തീഫ്, റാസ് തനൂറ, അല്‍-അഹ്‌സ, അല്‍-ഉദൈദ്, ബുഖൈഖ് എന്നിവിടങ്ങളില്‍ കാഴ്ചാപരിധി 3-5 കിലോമീറ്ററായി കുറയാന്‍ സാധ്യതയുണ്ട്. ഈ മുന്നറിയിപ്പ് രാത്രി 8 മണി വരെ തുടരുമെന്ന് നാഷണല്‍ സെന്റര്‍ ഓഫ് മെറ്റീരിയോളജി അറിയിച്ചു.