കൊച്ചി: മെട്രോ റെയില്‍പ്പാലത്തിന് മുകളില്‍നിന്ന് ചാടിയ മലപ്പുറം സ്വദേശിയായ യുവാവിന് ദാരുണാന്ത്യം. മലപ്പുറം ചുള്ളിപ്പാറ വീരാശേരി കുഞ്ഞുമൊയ്തീന്റെ മകന്‍ നിസാര്‍ (32) ആണ് മരിച്ചത്.

ഇന്ന് ഉച്ചയോടെ തൃപ്പൂണിത്തുറ വടക്കേക്കോട്ട-എസ്എന്‍ ജങ്ഷന്‍ മെട്രോ സ്റ്റേഷനുകള്‍ക്കിടയിലാണ് സംഭവം. പാളത്തിലൂടെ തലങ്ങും വിലങ്ങും നടക്കുകയും ചാടാന്‍ ശ്രമിക്കുകയും ചെയ്യുന്ന യുവാവിനോട് 'ചാടല്ലേ, ചാടല്ലേ' എന്ന് പലരും വിളിച്ചു പറഞ്ഞുവെങ്കിലും അതു ചെവിക്കൊള്ളാതെ ചാടുകയായിരുന്നു. വിവരമറിഞ്ഞ് ഫയര്‍ഫോഴ്‌സ് സംഘം കുതിച്ചെത്തി താഴെ വല വിരിച്ചെങ്കിലും വലയ്ക്ക് പുറത്തേക്ക് ചാടുകയായിരുന്നു. താഴെ വീണ് അതീവഗുരുതരാവസ്ഥയില്‍ എറണാകുളത്തെ സ്വകാര്യ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.

വടക്കേകോട്ടയില്‍നിന്ന് തൃപ്പൂണിത്തുറക്ക് ടിക്കറ്റ് എടുത്താണ് നിസാര്‍ പ്ലാറ്റ്‌ഫോമില്‍ പ്രവേശിച്ചത്. തുടര്‍ന്നു പ്ലാറ്റ്‌ഫോമിലെ മഞ്ഞവര മറികടന്നു പാളത്തിലേക്ക് ഓടി. ഇത് ശ്രദ്ധയില്‍പെട്ട മെട്രോ അധികൃതര്‍ വൈദ്യുതി ബന്ധം വിച്ഛേദിക്കുകയും ട്രെയിനുകള്‍ ഓട്ടം നിര്‍ത്തുകയും ചെയ്തു. തിരിച്ചുവരാന്‍ റെയില്‍വേ സ്റ്റേഷനിലുള്ളവരും ചാടാതിരിക്കാന്‍ പാളത്തിന് താഴെയുള്ളവരും പരമാവധി ശ്രമിച്ചെങ്കിലും വിജയിച്ചില്ല. അനുനയിപ്പിച്ചു താഴെയിറക്കാനുള്ള ശ്രമവും പരാജയപ്പെടുകയായിരുന്നു.