കുവൈത്ത് സിറ്റി: കുവൈത്തില്‍ വ്യാജ മദ്യം കഴിച്ചു 13 പേര്‍ മരിച്ചവരുടെ എണ്ണം 13 ആയി. മെഥനോള്‍ കലര്‍ന്ന പാനീയങ്ങള്‍ കഴിച്ചതിനെ തുടര്‍ന്ന് ശനിയാഴ്ച മുതല്‍ രാജ്യത്തെ വിവിധ ആശുപത്രികളില്‍ 63 പേര്‍ ചികിത്സ തേടി. ഇതില്‍ 13 പേര്‍ മരിച്ചതായും ആരോഗ്യ മന്ത്രാലയം സ്ഥിരീകരിച്ചു. മരിച്ചവരെല്ലാം ഏഷ്യന്‍ വംശജരാണ്.

നിരവധി പേര്‍ ഇപ്പോഴും തീവ്രപരിചരണ വിഭാഗത്തില്‍ ചികില്‍സയിലാണ്. 31 കേസുകളില്‍ സി.പി.ആര്‍ ചികിത്സ നല്‍കി. 51 പേര്‍ അടിയന്തര ഡയാലിസിസിന് വിധേയരായി. 21 പേര്‍ക്ക് സ്ഥിരമായോ താല്‍ക്കാലികമായോ കാഴ്ച നഷ്ടപ്പെട്ടതായും ആരോഗ്യ മന്ത്രാലയം വെളിപ്പെടുത്തി. വിഷയത്തില്‍ പ്രാദേശിക ആശുപത്രികളും സുരക്ഷാ വകുപ്പുകളും തമ്മില്‍ ഏകോപനം തുടരുന്നതായും ആരോഗ്യ മന്ത്രാലയം വാര്‍ത്താകുറിപ്പില്‍ വ്യക്തമാക്കി.

പ്രാദേശികമായി നിര്‍മിച്ച മദ്യം കഴിച്ചു ഫര്‍വാനിയ, അദാന്‍ ആശുപത്രികളില്‍ നിരവധി പ്രവാസികളെ കഴിഞ്ഞ ദിവസങ്ങളില്‍ പ്രവേശിപ്പിച്ചിരുന്നു. മരിച്ചവരില്‍ മലയാളികളും ഉള്‍പ്പെട്ടതായാണ് വിവരം. എന്നാല്‍ മരിച്ചവരുടെ പേരുവിവരങ്ങള്‍ ലഭ്യമായിട്ടില്ല.