കൊച്ചി: താരസംഘടന അമ്മയുടെ ഭരണസമിതി തെരഞ്ഞെടുപ്പ് ഇന്ന് കൊച്ചിയില്. രാവിലെ 10 മണി മുതല് ഒരു മണി വരെ ലുലു മാരിയറ്റ് ഹോട്ടലിലാണ് വോട്ടെടുപ്പ്. ഇന്ന് വൈകിട്ടോടെ ഫല പ്രഖ്യാപനവും ഉണ്ടാകുംം. ജനറല് ബോഡിയിലെ 507 അംഗങ്ങള്ക്കാണ് വോട്ട് ചെയ്യാനുള്ള യോഗ്യത. ഇതില് 233 പേര് സ്ത്രീകളാണ്.
പ്രസിഡന്റ് സ്ഥലത്തേക്ക് ദേവനും ശ്വേത മേനോനും തമ്മിലാണ് മത്സരം. ജനറല് സെക്രട്ടറി സ്ഥലത്തേക്ക് രവീന്ദ്രന്, കുക്കു പരമേശ്വരന് എന്നിവരാണ് മത്സര രംഗത്തുള്ളത്. എക്സിക്യൂട്ടീവ് കമ്മറ്റി അടക്കം മറ്റു പ്രധാന സ്ഥാനങ്ങളിലേക്കും ഇന്ന് അംഗങ്ങളെ തെരഞ്ഞെടുക്കും. നേരത്തെ ജോ. സെക്രട്ടറി സ്ഥാനത്തേക്ക് അന്സിബ എതിരില്ലാതെ തെരഞ്ഞടുക്കപ്പെട്ടിരുന്നു.
ട്രഷറര് സ്ഥാനത്തേക്ക് ഉണ്ണി ശിവപാല്, അനൂപ് ചന്ദ്രന് എന്നിവരാണ് മത്സരരംഗത്തുള്ളത്. നാസര് ലത്തീഫ്, ജയന് ചേര്ത്തല, ലക്ഷ്മി പ്രിയ എന്നിവര് വൈസ് പ്രസിഡന്റ് സ്ഥാനത്തേക്ക് മത്സര രംഗത്തുണ്ട്. ഏഴംഗ എക്സിക്യൂട്ടിവിലേക്ക് 11 പേരാണ് മത്സരിക്കുന്നത്. 74 പേര് നാമനിര്ദേശപത്രിക സമര്പ്പിച്ച ഭാരവാഹി തെരഞ്ഞെടുപ്പില് അവസാന നിമിഷം ഭൂരിഭാഗംപേരും പിന്വാങ്ങുകയായിരുന്നു. സൂക്ഷ്മപരിശോധനയില് പത്തെണ്ണം തള്ളുക പ്രസിഡന്റ് സ്ഥാനത്തേക്ക് ജഗദീഷ്, ജനറല് സെക്രട്ടറിയായി ബാബുരാജ് എന്നിവരും മത്സരിക്കാന് തീരുമാനിച്ചിരുന്നു. പ്രസിഡന്റായി വനിത എത്തട്ടെയെന്ന് പറഞ്ഞായിരുന്നു ജഗദീഷിന്റെ പിന്മാറ്റം. ഹേമ കമ്മിറ്റി റിപ്പോര്ട്ടിന് പിന്നാലെയുണ്ടായ ആരോപണങ്ങളില് അകപ്പെട്ട ബാബുരാജിനെതിരെ ആക്ഷേപങ്ങള് ശക്തമായതോടെ അദ്ദേഹം മത്സരരംഗത്തുനിന്ന് പിന്വാങ്ങി. വൈസ് പ്രസിഡന്റ് സ്ഥാനത്തേക്ക് മത്സരിക്കാനിരുന്ന നവ്യനായരും ആശ അരവിന്ദും ഒടുവില് പിന്മാറി.
സിനിമാ മേഖലയെ ആകെ നാണക്കേടിലാക്കിയ വിവാദമായ വെളിപ്പെടുത്തലുകളോടെ ഹേമ കമ്മിറ്റി റിപ്പോര്ട്ട് പുറത്ത് വന്നതിന് ശേഷം പിടിച്ചുനില്ക്കാനാകാതെയാണ് കഴിഞ്ഞ ആഗസ്റ്റ് 27ന് മോഹന്ലാല് നേതൃത്വം നല്കുന്ന 'അമ്മ'യുടെ ഭരണസമിതി രാജിവെച്ചൊഴിഞ്ഞത്. അതിന് ശേഷം അഡ്ഹോക്ക് കമ്മിറ്റി ഭരണം ഏറ്റെടുത്തെങ്കിലും വിവാദങ്ങള്ക്ക് പഞ്ഞമുണ്ടായില്ല. ഒരു വര്ഷത്തോട് അടുക്കുന്ന വേളയില് 'അമ്മ' തെരഞ്ഞെടുപ്പ് പ്രഖ്യാപിച്ചതിന് പിന്നാലെ പ്രസിഡന്റ് സ്ഥാനത്തേക്ക് മത്സരിക്കാനില്ലെന്ന് മോഹന്ലാല് വ്യക്തമാക്കിയിരുന്നു. ഇതോടെ ഒരു സ്ത്രീ സംഘടനയെ നയിക്കുന്നതിലേക്ക് എത്തട്ടേയെന്ന രീതിയില് ചര്ച്ചകളുണ്ടായി. ആരോപണവിധേയര് മാറി നില്ക്കണമെന്ന് വന്നതോടെ പലര്ക്കും മത്സരിക്കാന് കഴിയാതെ വന്നു.
അതിനിടെ മത്സര രംഗത്തുള്ള സ്ത്രീകള്ക്കെതിരെയും ആരോപണങ്ങളുയര്ന്നു. കുക്കു പരമേശ്വരനെതിരെ മെമ്മറി കാര്ഡ് വിവാദമാണ് സിനിമാ മേഖലയിലെ സ്ത്രീകള് തന്നെ ഉയര്ത്തിയത്. തങ്ങള് നേരിട്ട പ്രശ്നങ്ങള് തുറന്ന് പറഞ്ഞ ദൃശ്യങ്ങള് ഉള്പ്പെട്ട മെമ്മറി കാര്ഡ് കുക്കു പരമേശ്വരന്റെ കൈവശമുണ്ടെന്നായിരുന്നു പൊന്നമ്മ ബാബു അടക്കം നടിമാര് ഉയര്ത്തിയ ആരോപണം. ശ്വേതാ മേനോനെതിരെ സാമ്പത്തിക ലാഭത്തിന് വേണ്ടി അശ്ലീല രംഗങ്ങളില് അഭിനയിച്ചെന്ന പേരില് കേസുമുണ്ടായി. ശ്വേത അഭിനയിച്ച ഗര്ഭനിരോധന ഉറയുടെ പരസ്യവും രതിനിര്വേദം, പാലേരിമാണിക്യം, കളിമണ്ണ് തുടങ്ങിയ സിനിമകളുമായിരുന്നു പരാതിക്കാരന് അശ്ലീലരംഗങ്ങളായി പരാതിയില് ഉന്നയിച്ചത്.
Related News
