ജിസാന്‍: അവധിക്കായി ഇന്ന് നാട്ടിലേക്ക് പോവാനിരുന്ന മലപ്പുറം സ്വദേശി ജിസാനിനടുത്ത് അബൂ അരീഷില്‍ വാഹനമിടിച്ചു മരിച്ചു. മഞ്ചേരി പാണായി സ്വദേശി റിയാസ് ബാബു കോര്‍മത്ത് (47) ആണ് മരിച്ചത്. ഇന്ന് ഉച്ചതിരിഞ്ഞുള്ള വിമാനത്തില്‍ നാട്ടിലേക്ക് പോവാനിരിക്കെ ഇന്നലെ സുഹൃത്തിനെ സന്ദര്‍ശിച്ചു മടങ്ങുന്നതിനിടെ കാറിടിച്ചായിരുന്നു മരണം. ഉടന്‍ ജിസാന്‍ കിങ് ഫഹദ് ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. അപകട സമയം പ്രദേശത്ത് കനത്ത മഴ ഉണ്ടായിരുന്നു. ബൈഷ് മിസ്ലിയയില്‍ മിനി മാര്‍ക്കറ്റ് ജീവനക്കാരനായിരുന്നു. സാമൂഹിക സംഘടനയായ 'ജല' യുമായി സഹകരിച്ചു പ്രവര്‍ത്തിച്ചിരുന്നു.

കോവിഡ് സമയം ബുദ്ധിമുട്ടിലായിരുന്ന ബൈഷിലെ പ്രവാസികള്‍ക്കിടയില്‍ ഭക്ഷണ വിതരണത്തിനും മറ്റു ജീവകാരുണ്യ പ്രവര്‍ത്തനങ്ങള്‍ക്കും സജീവമായിരുന്നു. നിയമനടപടികള്‍ പൂര്‍ത്തിയാക്കി മൃതദേഹം സൗദിയില്‍ ഖബറടക്കുമെന്ന് ബന്ധപ്പെട്ടവര്‍ അറിയിച്ചു.