മലപ്പുറം: സംസ്ഥാന ഹജ്ജ് കമ്മിറ്റി മുഖേന 2026 ഹജ്ജിന് തിരഞ്ഞെടുക്കപ്പെട്ടവര്‍ക്ക് മൂന്ന് ഘട്ടങ്ങളിലായി ഹജ്ജ് സാങ്കേതിക പരിശീലന ക്ലാസ്സുകള്‍ സംഘടിപ്പിക്കും. ഹജ്ജ് കമ്മിറ്റിയുടെ ട്രൈനിംഗ് ഓര്‍ഗനൈസര്‍മാരുടെ നേതൃത്വത്തിലാണ് ക്ലാസുകള്‍ നടക്കുക. സംസ്ഥാന ഹജ്ജ് കമ്മിറ്റിയാണ് ഔദ്യാഗികമായി സംഘടിപ്പിക്കുന്ന ഈ ക്ലാസുകളില്‍ തെരഞ്ഞെടുക്കപ്പെട്ട എല്ലാവരും പങ്കെടുക്കല്‍ നിര്‍ബന്ധമാണ്. നിലിവില്‍ വെയ്റ്റിംഗ് ലിസ്റ്റിലുള്ള ക്രമനമ്പര്‍ 6000 വരെയുള്ളവരും ഹജ്ജ് കമ്മിറ്റിയുടെ ക്ലാസ്സുകളില്‍ പങ്കെടുക്കണം.

സൗദി അറേബ്യ ഇന്ത്യയുടെ ഹജ്ജ് ക്വാട്ട ഇതുവരെ പ്രഖ്യാപിച്ചിട്ടില്ല. ക്വാട്ട പ്രഖ്യാപിക്കുന്നതിനനുസരിച്ച് കേന്ദ്ര ഹജ്ജ് കമ്മിറ്റി സംസ്ഥാനത്തിന്റെ ക്വാട്ടയും നിശ്ചയിക്കും. ക്വാട്ട ലഭിക്കുന്നതിനുസരിച്ച് വെയ്റ്റിംഗ് ലിസ്റ്റ് ക്രമത്തില്‍ അവസരം ലഭിക്കുകയും ചെയ്യും.

സംസ്ഥാനതല ഒന്നാം ഘട്ട സാങ്കേതിക പരിശീലന ക്ലാസുകള്‍ സെപ്റ്റംബര്‍ ഒന്നിന് സ്പോര്‍ട്സ്, ന്യൂനപക്ഷക്ഷേമ ഹജ്ജ്, വഖഫ് വകുപ്പ് മന്ത്രി വി. അബ്ദുറഹ്‌മാന്‍ താനൂരില്‍ നിര്‍വ്വഹിക്കും. തുടര്‍ന്നുള്ള ദിവസങ്ങളില്‍ 14 ജില്ലകളിലും ഹജ്ജ് ട്രൈനര്‍മാരുടെ നേതൃത്വത്തില്‍ ക്ലാസ്സുകള്‍ നടക്കും. ഹജ്ജിന്റെ സാങ്കേതിക നിര്‍ദ്ദേശങ്ങള്‍, ആരോഗ്യ മുന്‍കരുതലുകള്‍, യാത്രാ സംവിധാനം തുടങ്ങി തീര്‍ത്ഥാടനവുമായി ബന്ധപ്പെട്ട എല്ലാ വിഷയങ്ങളും ഉള്‍പ്പെടുത്തിയാണ് ക്ലാസ്സുകള്‍ സംഘടിപ്പിക്കുന്നത്.

വിശദ വിവരങ്ങള്‍ക്ക് ഹജ്ജ് കമ്മിറ്റി ഓഫീസുമായോ, ഹജ്ജ് കമ്മിറ്റിയുടെ ട്രൈനിംഗ് ഓര്‍ഗനൈസര്‍മാരുമായോ ബനധപ്പെടുക. ഫോണ്‍: 0483-2710717, 2717572, 8281211786.