ജിദ്ദ: ആഡംബര ടൂറിസത്തിന് പുതിയ വഴികള് തുറക്കാന് ലക്ഷ്യമിട്ട് സൗദിയുടെ പ്രധാന ടൂറിസം പദ്ധതിയായ റെഡ് സീയും റിയാദ് എയറും സഹകരണ കരാറില് ഒപ്പുവെച്ചു. റെഡ് സീ അന്താരാഷ്ട്ര വിമാനത്താവളത്തില് ഇരു കമ്പനികളുടെയും സിഇഒമാര് പങ്കെടുത്ത ചടങ്ങിലായിരുന്നു കരാര് ഒപ്പുവെച്ചത്. ഇതുപ്രകാരം റെഡ് സിയുടെയും റിയാദ് എയറിന്റെയും ബ്രാന്ഡുകള് ഇതുവഴി ശക്തിപ്പെടുത്തുകയും സംയുക്തമായി വിപണന പ്രവര്ത്തനങ്ങള് നടത്തുകയും ചെയ്യും. റെഡ് സീയിലേക്ക് കൂടുതല് വിമാന സര്വീസുകള് ആരംഭിക്കാനും ധാരണയായി.
ഈ വര്ഷം അവസാനത്തോടെയാണ് റിയാദ് എയര് സര്വീസ് ആരംഭിക്കുന്നത്. ആഗോളതലത്തില് സുസ്ഥിര ആഡംബര വിനോദസഞ്ചാര കേന്ദ്രമായി റെഡ്സീയെ കരാറിലൂടെ പ്രമോട്ട് ചെയ്യും. അതോടൊപ്പം റിയാദ് എയറിനെ ലോകത്തിന്റെ വിവിധ ഭാഗങ്ങളില് യാത്ര ചെയ്യുന്നവര്ക്കുള്ള ഇഷ്ട വിമാനക്കമ്പനിയായും വളര്ത്തും. സതേണ് ഡ്യൂണ്സ്, ഷെബാര, ഡെസേര്ട്ട് റോക്ക് തുടങ്ങി അഞ്ചോളം അത്യാഡംബര റിസോര്ട്ടുകളാണ് റെഡ് സീയില് പ്രവര്ത്തിക്കുന്നത്. റിയാദ് എയര് അതിഥികള്ക്ക് ഇവ ആസ്വദിക്കാന് എക്സ്ക്ലൂസീവ് ഓഫറുകളും പാക്കേജുകളും ലഭ്യമാക്കും.
Related News
