തിരുവനന്തപുരം: കഴക്കൂട്ടം ദേശീയപാതയില്‍ നിയന്ത്രണംവിട്ട കാര്‍ എലിവേറ്റഡ് ഹൈവേയുടെ തൂണിലിടിച്ചുണ്ടായ അപകടത്തില്‍ യുവാവ് മരിച്ചു. ബാലരാമപുരം സ്വദേശി ഷിബിന്‍ (28) ആണ് മരിച്ചത്. അപകടത്തില്‍ യുവതിയടക്കം രണ്ട് പേര്‍ക്ക് ഗുരുതരമായി പരിക്കേറ്റു. ഷിബിനെ കൂടാതെ ബാലരാമപുരം സ്വദേശികളായ രജനീഷ്, കിരണ്‍, അഖില, ശ്രീലക്ഷ്മി എന്നിവരാണ് വാഹനത്തിലുണ്ടായിരുന്നത്. ഇവരില്‍ രണ്ട് പേര്‍ക്കാണ് ഗുരുതരമായി പരിക്കേറ്റത്. അര്‍ദ്ധരാത്രി പന്ത്രണ്ടരയോടെയായിരുന്നു അപകടം.

ഇടിയുടെ ആഘാതത്തില്‍ വാഹനത്തിന്റെ മുന്‍ഭാഗം പൂര്‍ണമായും തകര്‍ന്നു. ഷിബിനായിരുന്നു വാഹനം ഓടിച്ചിരുന്നതെന്നാണ് പൊലീസ് പറയുന്നത്. പരിക്കേറ്റവര്‍ മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. വാഹനം അമിതവേഗത്തിലായിലായിരുന്നു. കാര്‍ റേസിംഗിനിടെയാണ് അപകടമുണ്ടായതെന്ന് സംശയിക്കുന്നു. സംഭവത്തില്‍ കഴക്കൂട്ടം പൊലീസ് അന്വേഷണം തുടങ്ങി. കാറിലുണ്ടായിരുന്നവര്‍ മദ്യലഹരിയിലായിരുന്നുവെന്നും പറയപ്പെടുന്നുണ്ട്.