കോട്ടയം: ഓണാവധിക്കായി കുടുംബ സമേതം നാട്ടിലെത്തിയ പ്രവാസി യുവാവ് കുഴഞ്ഞു വീണു മരിച്ചു. യുകെയിലെ സോമര്‍സെറ്റ് യോവിലില്‍ കുടുംബമായി താമസിച്ചിരുന്ന ചങ്ങനാശ്ശേരി സ്വദേശി വിശാഖ് മേനോന്‍ (46) ആണ് മരിച്ചത്. ഹൃദയാഘാതമാണ് മരണം കാരണം. യോവില്‍ എന്‍എച്ച്എസ് ട്രസ്റ്റിലെ നഴ്സായ രശ്മി നായരാണ് ഭാര്യ. മകന്‍: അമന്‍. പെരുന്ന അമൃതവര്‍ഷിണിയില്‍ ഗോപാലകൃഷ്ണ മേനോനും ശ്രീകലയുമാണ് മാതാപിതാക്കള്‍.

കഴിഞ്ഞ ദിവസം രാവിലെ കോട്ടയം പൂവന്തുരുത്തിലെ ഭാര്യ വീട്ടില്‍ വച്ചായിരുന്നു അന്ത്യം. യോവില്‍ ഹിന്ദു സമാജം എക്സിക്യൂട്ടീവ് കമ്മിറ്റി അംഗം, സോമര്‍സെറ്റ് മലയാളി കള്‍ച്ചറല്‍ അസ്സോസിയേഷന്‍ അംഗം തുടങ്ങിയ നിലകളില്‍ പ്രവര്‍ത്തിച്ചിരുന്നു. യുക്മയുടെ മുന്‍ അസോസിയേഷന്‍ പ്രതിനിധിയായിരുന്നു. ഏറെ നാളായി യോവിലില്‍ താമസിച്ചിരുന്ന വിശാഖ് പുതിയ ജോലി കിട്ടിയതിനെ തുടര്‍ന്ന് യുകെയിലെ തന്നെ ഷെഫീല്‍ഡിലേക്ക് മാറുന്നതിനുള്ള തയാറെടുപ്പിലായിരുന്നു. അതിനു മുന്‍പായി നാട്ടിലെത്തി ബന്ധുക്കളെ സന്ദര്‍ശിക്കുന്നതിനും ഓണം ആഘോഷിക്കുന്നതിനുമാണ് നാട്ടിലെത്തിയത്.