റിയാദ്: തീപിടിത്തം തടയുന്നതിനുള്ള സംവിധാനങ്ങള്‍ പരിപാലിക്കാത്ത സ്ഥാപനങ്ങള്‍ക്കെതിരെ കര്‍ശന നടപടി സ്വീകരിക്കുമെന്ന് സൗദി സിവില്‍ ഡിഫന്‍സ് മുന്നറിയിപ്പ് നല്‍കി. ഫയര്‍ അലാറം പോലുള്ള സുരക്ഷാ സംവിധാനങ്ങള്‍ കൃത്യമായി പരിപാലിക്കാത്തത് ഗുരുതരമായ നിയമലംഘനമാണെന്നും ഇത് നിയമപരമായ ശിക്ഷാനടപടികള്‍ക്ക് കാരണമാകുമെന്നും സിവില്‍ ഡിഫന്‍സ് വ്യക്തമാക്കി.

സ്ഥിരമായി നടത്തിവരുന്ന പരിശോധനകളില്‍ പല സ്ഥാപനങ്ങളിലും അലാറം സംവിധാനങ്ങളുടെ പരിപാലനത്തില്‍ വീഴ്ച വരുത്തിയതായി കണ്ടെത്തിയിട്ടുണ്ട്. നിയമലംഘനം നടത്തിയ സ്ഥാപനങ്ങള്‍ക്കെതിരെ ശിക്ഷാ നടപടികള്‍ സ്വീകരിച്ചതായും സിവില്‍ ഡിഫന്‍സ് അറിയിച്ചു.

ജീവിതവും സ്വത്തുക്കളും സംരക്ഷിക്കുന്നതിന് എല്ലാ സ്ഥാപനങ്ങളും സുരക്ഷാ നടപടികളും പാലിക്കണമെന്ന് സിവില്‍ ഡിഫന്‍സ് അഭ്യര്‍ത്ഥിച്ചു. പ്രതിരോധ സംവിധാനങ്ങളുടെ പതിവായ പരിപാലനം ലൈസന്‍സ് നേടുന്നതിനുള്ള പ്രധാന വ്യവസ്ഥയാണെന്നും അവര്‍ കൂട്ടിച്ചേര്‍ത്തു.