ജിദ്ദ: പ്രവാസികള്‍ക്ക് സാമ്പത്തിക ആസൂത്രണത്തിന്റെ ആവശ്യകത ബോധ്യപ്പെടുത്തി RSC സൗദി വെസ്റ്റ് വിസ്ഡം ക്ലസ്റ്ററിനു കീഴില്‍ സംഘടിപ്പിച്ച 'വെല്‍ത്ത് വിസ്ഡം: എക്‌സ്‌പേര്‍ട്ട് ഗൈഡന്‍സ് ഫോര്‍ സ്മാര്‍ട്ടര്‍ ഫിനാന്‍ഷ്യല്‍ ഡിസിഷന്‍സ്' എന്ന വെബിനാര്‍ ശ്രദ്ധേയമായി. ഓണ്‍ലൈനായി സംഘടിപ്പിച്ച പരിപാടിയില്‍ നിരവധി പ്രവാസി മലയാളികള്‍ പങ്കെടുത്തു.

ചാര്‍ട്ടേഡ് അക്കൗണ്ടന്റും എസ്.എസ്.എഫ് കേരളയുടെ സെക്രട്ടറിയുമായ അഹമ്മദ് റാസി വെബിനാറിന് നേതൃത്വം നല്‍കി. പ്രവാസജീവിതത്തില്‍ കൃത്യമായ സാമ്പത്തിക ആസൂത്രണം ഉണ്ടാകേണ്ടതിന്റെ പ്രാധാന്യത്തെക്കുറിച്ച് അദ്ദേഹം വിശദീകരിച്ചു. വരുമാനം കൈകാര്യം ചെയ്യേണ്ട രീതികള്‍, വിരമിക്കല്‍ കാലത്തേക്കുള്ള നീക്കിയിരിപ്പ്, നിക്ഷേപങ്ങള്‍ എന്നിവയെക്കുറിച്ച് അദ്ദേഹം വ്യക്തമായ നിര്‍ദേശങ്ങള്‍ നല്‍കി.

അനാവശ്യമായ സാമ്പത്തിക ബാധ്യതകള്‍ ഒഴിവാക്കുന്നതിനെക്കുറിച്ചും അദ്ദേഹം പങ്കെടുത്തവരെ ബോധവാന്മാരാക്കി. അത്യാവശ്യമില്ലാതെ ക്രെഡിറ്റ് കാര്‍ഡുകളും ഇ.എം.ഐ പോലുള്ള സംവിധാനങ്ങളും ഉപയോഗിക്കുന്നത് അനാവശ്യമായ അധികച്ചെലവുകള്‍ക്ക് കാരണമാകുമെന്ന് അദ്ദേഹം ഓര്‍മ്മിപ്പിച്ചു.

RSC സൗദി വെസ്റ്റ് നു കീഴില്‍ പൊതുജനങ്ങള്‍ക്ക് വിവിധ മേഖലകളില്‍ വിദഗ്ധരുമായി സംവദിക്കാനുള്ള അവസരം ഒരുക്കുക എന്ന ലക്ഷ്യത്തോടെ മാസത്തില്‍ നടന്നു വരുന്ന 'Listen to Expert' എന്ന പരമ്പരയിലെ പതിനൊന്നാമത്തെ എപ്പിസോഡായിരുന്നു കഴിഞ്ഞ ദിവസം നടന്നത്. നാഷനല്‍ സെക്രട്ടറി നാസിക് പുളിക്കല്‍ അധ്യക്ഷത വഹിച്ച പരിപാടിയില്‍ അസ്ഹര്‍ സ്വാഗതവും റിയാസ് മടത്തറ നന്ദിയും പറഞ്ഞു.