തിരുവനന്തപുരം: തലസ്ഥാന നഗരിയില്‍ മദ്യലഹരിയില്‍ പിതാവ് മകനെ വെട്ടിക്കൊന്നു. കാര്യവട്ടം ഉള്ളൂര്‍ക്കോണത്താണ് സംഭവം. വലിയവിള പുത്തന്‍വീട്ടില്‍ ഉല്ലാസ് (35) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് പിതാവ് ഉണ്ണികൃഷ്ണന്‍ നായരെ പോത്തന്‍കോട് പൊലീസ് കസ്റ്റഡിയിലെടുത്തു. വീട്ടിനുള്ളില്‍ രക്തത്തില്‍ കുളിച്ച നിലയില്‍ ആയിരുന്നു ഉല്ലാസിന്റെ മൃതദേഹം. മദ്യലഹരിയില്‍ അടിപിടിക്കിടെ സംഭവിച്ചതാണെന്നാണ് പ്രാഥമിക നിഗമനം.

ഇന്നു പുലര്‍ച്ചെയാണ് സംഭവം. ഉണ്ണികൃഷ്ണന്‍ തന്നെയാണ് തൊട്ടടുത്ത വീട്ടിലുണ്ടായിരുന്ന ഭാര്യ ഉഷയോട് ഉല്ലാസ് രക്തത്തില്‍ കുളിച്ച് കിടക്കുന്നതായി പറഞ്ഞത്. ഉഷ വന്ന് നോക്കുമ്പോള്‍ വീട്ടിലെ ഹാളിനുള്ളില്‍ മകന്‍ രക്തത്തില്‍ കുളിച്ചു കിടക്കുന്നതാണ് കണ്ടത്. ഉടന്‍ പോത്തന്‍കോട് പൊലീസില്‍ വിവരം അറിയിച്ചു. പോലീസ് എത്തി മേല്‍നടപടികള്‍ സ്വീകരിച്ചു വരുന്നു.