റിയാദ്: 38 വര്‍ഷം പഴക്കമുള്ള ആയുധ നിയന്ത്രണ ഉടമ്പടി തിരുത്തി റീപ്പര്‍ ഡ്രോണുകള്‍ വിദേശ രാജ്യങ്ങള്‍ക്ക് വില്‍ക്കാന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് അനുമതി നല്‍കുമെന്ന് യു.എസ് ഉദ്യോഗസ്ഥരെയും വിഷയത്തില്‍ പരിചയമുള്ള നാല് കേന്ദ്രങ്ങളെയും ഉദ്ധരിച്ച് റോയിട്ടേഴ്‌സ് റിപ്പോര്‍ട്ട് ചെയ്തു. ഈ നീക്കം സൗദി അറേബ്യയുമായി 100-ലധികം എംക്യു-9 (MQ-9) ഡ്രോണുകള്‍ വില്‍ക്കുന്നതിനുള്ള യുഎസ് ഇടപാടിനുള്ള തടസ്സങ്ങള്‍ നീക്കുമെന്ന് റോയിട്ടേഴ്‌സ് പറയുന്നു.
സൗദി അറേബ്യ റീപ്പര്‍ ഡ്രോണുകള്‍ വാങ്ങാന്‍ ഈയിടെ അനുമതി തേടിയിരുന്നു. ഈ വില്‍പ്പന യാഥാര്‍ഥ്യമാവുകയാണെങ്കില്‍, മെയില്‍ പ്രഖ്യാപിച്ച 142 ബില്യണ്‍ ഡോളറിന്റെ ആയുധ ഇടപാടിന്റെ ഭാഗമായിരിക്കും ഇത്.
1987-ലെ ആന്റി-ബാലിസ്റ്റിക് മിസൈല്‍ ടെക്നോളജി കണ്‍ട്രോള്‍ ട്രീറ്റി (ABCT) അനുസരിച്ച് മിസൈല്‍ സംവിധാനങ്ങളായി കണക്കാക്കിയിരുന്ന ഡ്രോണുകളെ എഫ്-16 പോര്‍വിമാനങ്ങള്‍ക്ക് സമാനമായി വിമാനങ്ങളായി പുനര്‍വര്‍ഗ്ഗീകരിക്കാനാണ് ട്രംപിന്റെ തീരുമാനം. ഇതിന് ശേഷം ഏറ്റവും വലിയ ഇടപാടുകള്‍ സൗദി അറേബ്യയുമായിട്ടായിരിക്കുമെന്നും റോയിട്ടേഴ്‌സ് സൂചിപ്പിക്കുന്നു.