മുംബൈ: വിമാനം പറന്ന് ഉയര്ന്നതിന് പിന്നാലെ ചക്രം ഊരിത്തെറിച്ചു. ഇതേത്തുടര്ന്ന് വിമാനം അടിയന്തരമായി ലാന്ഡ് ചെയ്തു. ഗുജറാത്തിലെ കണ്ട്ല വിമാനത്താവളത്തില് നിന്ന് മുംബയിലേക്ക് പുറപ്പെട്ട സ്പൈസ് ജെറ്റ് വിമാനത്തിന്റെ ചക്രമാണ് ഊരിത്തെറിച്ചത്. 75 യാത്രക്കാരുമായാണ് വിമാനം പറന്നുയര്ന്നത്. എമര്ജന്സി ലാന്ഡിംഗ് നടത്തിയ വിമാനത്തിലെ എല്ലാ യാത്രക്കാരും സുരക്ഷിതരാണെന്ന് വിമാനക്കമ്പനി അധികൃതര് അറിയിച്ചു.
വിമാനത്തിന്റെ പിന് ചക്രങ്ങളില് ഒരെണ്ണമാണ് ഊരിത്തെറിച്ചത്. പറന്ന് ഉയര്ന്ന ഉടനെ തന്നെ വിമാനത്തില് നിന്ന് ഒരു കറുത്ത വസ്തു തെറിച്ചു പോകുന്നത് കണ്ട്രോള് സെന്ററിലെ ഉദ്യോഗസ്ഥന് കണ്ടിരുന്നു. എന്നാല് ഉയരത്തില് നിന്നായതിനാല് എന്ത് വസ്തുവാണെന്ന് കൃത്യമായി മനസ്സിലാക്കാന് കഴിഞ്ഞിരുന്നില്ല. തുടര്ന്ന് ഇവര് നടത്തിയ പരിശോധനയില് വിമാനത്തിന്റെ പിന് ചക്രമാണതെന്ന് കണ്ടെത്തുകയായിരുന്നു.
പൈലറ്റിനെ ഇക്കാര്യം അറിയിച്ചശേഷം മുംബൈ വിമാനത്താവളത്തില് ജാഗ്രതാ നിര്ദേശം നല്കി. തുടര്ന്ന് വിമാനം സുരക്ഷിതമായി ലാന്ഡ് ചെയ്യുകയായിരുന്നു.
Related News
