ടിറാന- അഴിമതി തുടച്ചുനീക്കുന്നതിനും പൊതു ധനകാര്യം സുതാര്യമായി കൈകാര്യം ചെയ്യുന്നതിനും ലക്ഷ്യമിട്ട് അല്ബേനിയന് പ്രധാനമന്ത്രി എഡി റമ തന്റെ പുതിയ സര്ക്കാരില് ഒരു വെര്ച്വല് മന്ത്രിയെ നിയമിച്ചു. മനുഷ്യന്റെ രൂപമില്ലാത്തതും, കൃത്രിമബുദ്ധി (എ.ഐ) ഉപയോഗിച്ച് പ്രവര്ത്തിക്കുന്നതുമായ ഒരു സംവിധാനം ഈ സ്ഥാനത്തെത്തുന്നത് ലോകത്ത് തന്നെ ആദ്യത്തേതാണ്.
'ഡില' എന്ന് പേരിട്ടിട്ടുള്ള ഈ വെര്ച്വല് മന്ത്രി, കാബിനറ്റിന്റെ ഭാഗമായി പ്രവര്ത്തിക്കും. അല്ബേനിയന് ഭാഷയില് 'സൂര്യന്' എന്നാണ് 'ഡില' എന്ന വാക്കിനര്ത്ഥം. അഴിമതിക്കെതിരെ പോരാടുന്നതിനും പൊതു ടെന്ഡറുകളില് പൂര്ണ്ണമായ സുതാര്യത ഉറപ്പാക്കുന്നതിനും വേണ്ടിയാണ് പുതിയ സംവിധാനം രൂപകല്പ്പന ചെയ്തിരിക്കുന്നത്.
നേരത്തെ, ഇ-ഗവണ്മെന്റ് സേവന പ്ലാറ്റ്ഫോമില് ഒരു ഡിജിറ്റല് അസിസ്റ്റന്റായി 'ഡില'യെ അവതരിപ്പിച്ചിരുന്നു. സര്ക്കാര് വെബ്സൈറ്റ് എങ്ങനെ ഉപയോഗിക്കണമെന്ന് പൗരന്മാര്ക്ക് മാര്ഗനിര്ദ്ദേശം നല്കുന്നതായിരുന്നു അന്ന് 'ഡില'യുടെ പ്രധാന ചുമതല. പരമ്പരാഗത അല്ബേനിയന് വസ്ത്രം ധരിച്ചാണ് അന്ന് 'ഡില' പ്രത്യക്ഷപ്പെട്ടിരുന്നത്.
മെയ് 11-ന് നടന്ന തിരഞ്ഞെടുപ്പില് റമയുടെ സോഷ്യലിസ്റ്റ് പാര്ട്ടി തുടര്ച്ചയായി നാലാം തവണയും വിജയിച്ചതിനെ തുടര്ന്നാണ് ഈ നീക്കം. 140 സീറ്റുകളില് 83 എണ്ണം നേടിയ പാര്ട്ടിക്ക് ഭരണഘടനാ ഭേദഗതികള്ക്ക് ആവശ്യമായ മൂന്നില് രണ്ട് ഭൂരിപക്ഷം (93 സീറ്റുകള്) ഇല്ലെങ്കില് പോലും മിക്ക നിയമനിര്മ്മാണങ്ങളും ഏകപക്ഷീയമായി പാസാക്കാന് കഴിയും. അഴിമതിക്കെതിരെ ശക്തമായ നിലപാടെടുത്തുകൊണ്ട് ഭരണത്തില് സാങ്കേതികവിദ്യയുടെ സാധ്യതകള് പൂര്ണമായും ഉപയോഗപ്പെടുത്താനാണ് ഈ വിര്ച്വല് മന്ത്രി പദവിയിലൂടെ പ്രധാനമന്ത്രി റമ ലക്ഷ്യമിടുന്നത്.
ഫോട്ടോ: അല്ബേനിയന് പ്രധാനമന്ത്രി എഡി റമ.
Related News
