റിയാദ്: ലോകത്തിലെ ഏറ്റവും വലിയ ഗുസ്തി മത്സരമായ റെസ്ല്‍മാനിയ 43-ന് റിയാദ് സീസണ്‍ 2027-ല്‍ ആതിഥേയത്വം വഹിക്കുമെന്ന് ജനറല്‍ എന്റര്‍ടൈന്‍മെന്റ് അതോറിറ്റി ഡയറക്ടര്‍ ബോര്‍ഡ് ചെയര്‍മാന്‍ തുര്‍ക്കി ബിന്‍ അബ്ദുള്‍മൊഹ്സെന്‍ അല്‍ ഷെയ്ഖ് പ്രഖ്യാപിച്ചു. റെസ്ല്‍മാനിയയുടെ ചരിത്രത്തില്‍ ആദ്യമായാണ് നോര്‍ത്ത് അമേരിക്കക്ക് പുറത്ത് ഒരു മത്സരം നടക്കുന്നത്.

WWEയുമായി സഹകരിച്ച് നടക്കുന്ന ഈ മത്സരം ഒരു നാഴികക്കല്ലാണെന്ന് അദ്ദേഹം പറഞ്ഞു. ''റെസ്ല്‍മാനിയ ആഗോള ഗുസ്തിയിലെ ഏറ്റവും വലിയ പരിപാടിയാണ്, റിയാദ് സീസണ്‍ 2027-ല്‍ ഇതിന് ആതിഥേയത്വം വഹിക്കുന്നത് ഒരു വലിയ മാറ്റമായിരിക്കും. ഈ ടൂര്‍ണമെന്റിന്റെ ചരിത്രത്തിനും ലോകമെമ്പാടുമുള്ള ആരാധകര്‍ക്കിടയിലുള്ള അതിന്റെ സ്ഥാനത്തിനും അനുയോജ്യമായ ഒരു അസാധാരണമായ പതിപ്പ് അവതരിപ്പിക്കാനാണ് ഞങ്ങള്‍ ലക്ഷ്യമിടുന്നത്,'' അല്‍ ഷെയ്ഖ് കൂട്ടിച്ചേര്‍ത്തു.

ജനറല്‍ എന്റര്‍ടൈന്‍മെന്റ് അതോറിറ്റിയുമായുള്ള പങ്കാളിത്തത്തെ WWE ചീഫ് കണ്ടന്റ് ഓഫീസര്‍ പോള്‍ ലെവസ്‌ക് പ്രശംസിച്ചു. തുര്‍ക്കി അല്‍-ഷെയ്ഖും ജനറല്‍ എന്റര്‍ടൈന്‍മെന്റ് അതോറിറ്റിയും വിനോദത്തിന്റെയും കായികരംഗത്തിന്റെയും ലോകത്ത് വിപ്ലവം സൃഷ്ടിച്ചു. അവര്‍ ഞങ്ങളുടെ മികച്ച പങ്കാളികളാണ്. റെസ്ല്‍മാനിയ 43 മുന്‍പൊരിക്കലും ഇല്ലാത്ത ഒരു തലത്തില്‍ എത്തിക്കാന്‍ അവരുമായി സഹകരിക്കുന്നതില്‍ ഞങ്ങള്‍ പ്രതീക്ഷയോടെ കാത്തിരിക്കുന്നു- അദ്ദേഹം പറഞ്ഞു.

2018 മുതല്‍ സൗദിയും WWEയും തമ്മിലുള്ള വിജയകരമായ പങ്കാളിത്തത്തിന്റെ തുടര്‍ച്ചയായാണ് ഈ പ്രഖ്യാപനം വരുന്നത്. ക്രൗണ്‍ ജൂവല്‍, എലിമിനേഷന്‍ ചേമ്പര്‍, കിംഗ് & ക്വീന്‍ ഓഫ് ദ റിംഗ്, നൈറ്റ് ഓഫ് ചാമ്പ്യന്‍സ് തുടങ്ങിയ പ്രധാന പരിപാടികള്‍ സൗദിയില്‍ ഇതിനോടകം നടന്നിട്ടുണ്ട്. കൂടാതെ, ഫ്രൈഡേ നൈറ്റ് സ്മാക്ക്ഡൗണ്‍, മണ്‍ഡേ നൈറ്റ് റോ തുടങ്ങിയ ഷോകളും സംഘടിപ്പിച്ചിട്ടുണ്ട്. അടുത്ത ജനുവരിയില്‍ റോയല്‍ റംബിളിന്റെ 39-ാമത് പതിപ്പിനും റിയാദ് ആതിഥേയത്വം വഹിക്കാന്‍ ഒരുങ്ങുകയാണ്, ഇത് യുഎസിലെ ESPNലും ആഗോളതലത്തില്‍ നെറ്റ്ഫ്‌ളിക്‌സിലും തത്സമയം സംപ്രേഷണം ചെയ്യും.