റിജാല് അല്മ: കനത്ത മഴയെത്തുടര്ന്നുണ്ടായ ശക്തമായ മിന്നലില് 72 ആടുകള് ചത്തു. റിജാല് അല്മ പ്രവിശ്യയിലെ അല് അഹ്മല് ഗ്രാമത്തിലാണ് സംഭവം. ഇന്നലെ ഉച്ചകഴിഞ്ഞാണ് ദാരുണമായ സംഭവം നടന്നത്.
മുഹമ്മദ് മുഹമ്മദ് അല്-ഗമൂര് എന്നയാളുടേതാണ് ആടുകള്. ശക്തമായ ഇടിയും മിന്നലും ഉണ്ടായപ്പോള് മരത്തിന് കീഴില് അഭയം തേടുകയായിരുന്നു ആടുകള്. അതിശക്തമായ മിന്നല് ആടുകള്ക്ക് മുകളില് പതിക്കുകയും മുഴുവന് ആടുകളും ചാവുകയും ചെയ്തു.
സംഭവം തന്നെ ഞെട്ടിച്ചെന്നും, കടുത്ത ദുഃഖമുണ്ടാക്കിയെന്നും അല്-ഗമൂര് പറഞ്ഞു. നഷ്ടപ്പെട്ടവക്ക് പകരം നല്കാന് ദൈവത്തോട് പ്രാര്ത്ഥിക്കുന്നതായും അദ്ദേഹം കൂട്ടിച്ചേര്ത്തു. റിജാല് അല്മ പ്രവിശ്യയില് ഇന്നലെ ഉച്ചകഴിഞ്ഞ് കനത്ത മഴയും ഇടിമിന്നലും ഉണ്ടായിരുന്നു. അത് വലിയ നാശനഷ്ടങ്ങള് വരുത്തുകയും ചെയ്തു.
