ദുബായ്- ദുബായുടെ ശൈത്യകാലത്തെ പ്രധാന ആകര്‍ഷണങ്ങളിലൊന്നായ ഗ്ലോബല്‍ വില്ലേജ് അതിന്റെ 30-ാം സീസണിന് തയ്യാറെടുക്കുമ്പോള്‍, അതിന്റെ വളര്‍ച്ചയുടെ നാഴികക്കല്ലുകള്‍ ഓര്‍ത്തെടുക്കാം. 1996-ല്‍ ദുബായ് മുനിസിപ്പാലിറ്റിക്ക് എതിര്‍വശത്തുള്ള പൊടി നിറഞ്ഞ, വാഹന പാര്‍ക്കിംഗ് സ്ഥലത്ത് ഏതാനും കിയോസ്‌കുകള്‍ മാത്രമായി തുടങ്ങിയ ഗ്ലോബല്‍ വില്ലേജ് ഇന്ന് ലോകം മുഴുവന്‍ അറിയുന്ന ഒരു വിനോദ കേന്ദ്രമായി മാറിയിരിക്കുന്നു.

ദുബായ് ഷോപ്പിംഗ് ഫെസ്റ്റിവലിന്റെ ഭാഗമായി, ലോകരാജ്യങ്ങളുടെ കരകൗശല വസ്തുക്കളും ഉല്‍പ്പന്നങ്ങളും പ്രദര്‍ശിപ്പിക്കാനുള്ള ഒരു ഇടം എന്ന നിലയിലാണ് ഗ്ലോബല്‍ വില്ലേജ് ആരംഭിച്ചത്. ആദ്യ സീസണില്‍ 50,000 ചതുരശ്ര മീറ്റര്‍ സ്ഥലത്ത് 5 ലക്ഷം സന്ദര്‍ശകരാണ് എത്തിയത്. ഇത് ഇന്നത്തെ കണക്കുകളുമായി താരതമ്യം ചെയ്യുമ്പോള്‍ വളരെ കുറവാണെങ്കിലും, ഒരു വലിയ സംരംഭത്തിന്റെ തുടക്കമായിരുന്നു.

1997-ല്‍ നടന്ന രണ്ടാം സീസണില്‍ രാജസ്ഥാനില്‍ നിന്നുള്ള നാടന്‍ നൃത്തങ്ങളും ആഫ്രിക്കന്‍ ഡ്രമ്മര്‍മാരും ദുബായ് ക്രീക്കില്‍ കാഴ്ചക്കാരെ അമ്പരപ്പിച്ചു. ഇത് ഒരു മള്‍ട്ടികള്‍ച്ചറല്‍ ഫെയറായി മാറാനുള്ള ഗ്ലോബല്‍ വില്ലേജിന്റെ തുടക്കമായിരുന്നു.

പുതിയ മില്ലെനിയത്തില്‍ ഗ്ലോബല്‍ വില്ലേജ് ഔദ് മേത്തയിലേക്കും പിന്നീട് ദുബായ് ഫെസ്റ്റിവല്‍ സിറ്റിയിലേക്കും മാറി. ഇതോടെ, അതിന്റെ വലുപ്പം അതിവേഗം വര്‍ധിച്ചു. 2004-ഓടെ 147,000 ചതുരശ്ര മീറ്റര്‍ സ്ഥലത്ത് 31 രാജ്യങ്ങളുടെ പവലിയനുകളും 3 ദശലക്ഷത്തിലധികം സന്ദര്‍ശകരും എത്തി. ഡച്ച് കാറ്റാടി മില്ലുകളും ഇന്ത്യയിലെ ചാര്‍മിനാറിന്റെ മാതൃകകളും പവലിയനുകളില്‍ ഇടംപിടിച്ചു.

നഗരവികസനം കാരണം ഗ്ലോബല്‍ വില്ലേജ് 2005-ല്‍ ദുബായ് ലാന്‍ഡിലെ ഷെയ്ഖ് മുഹമ്മദ് ബിന്‍ സായിദ് റോഡിന് സമീപം സ്ഥിരമായ സ്ഥലത്തേക്ക് മാറി. 17.2 ദശലക്ഷം ചതുരശ്ര അടി വിസ്തീര്‍ണ്ണമുള്ള ഈ സ്ഥലം വലിയ പാര്‍ക്കിംഗ് സ്ഥലങ്ങള്‍, കാര്‍ണിവല്‍ റൈഡുകള്‍, രാത്രികാലങ്ങളില്‍ വെടിക്കെട്ടുകള്‍, 90-ല്‍ അധികം പവലിയനുകള്‍ എന്നിവ ഉള്‍ക്കൊള്ളുന്നു. 2010 മുതല്‍ ഗ്ലോബല്‍ വില്ലേജിന്റെ സുവര്‍ണ്ണ കാലഘട്ടമായിരുന്നു. ഷാരൂഖ് ഖാന്‍ ഇന്ത്യന്‍ പവലിയനില്‍ അപ്രതീക്ഷിതമായി പ്രത്യക്ഷപ്പെട്ടതും ജേസണ്‍ ഡെറുലോയും ലിയാം പെയ്‌നും പ്രധാന വേദിയില്‍ നടത്തിയ പ്രകടനങ്ങളും വന്‍ ജനക്കൂട്ടത്തെ ആകര്‍ഷിച്ചു.

എന്നാല്‍, ഇതിനിടയില്‍ ചില വിവാദങ്ങളും ഉണ്ടായി. 2008-ല്‍ ഒരു യെമനി കച്ചവടക്കാരന്‍ 'വെടിയുണ്ടകളെ പ്രതിരോധിക്കുന്ന' ഒരു കല്ല് 1.8 ബില്യണ്‍ ദിര്‍ഹത്തിന് വില്‍ക്കാന്‍ ശ്രമിച്ചതിന് ദുബായില്‍ അറസ്റ്റിലായി.

2005-ല്‍ ഒരു ചെറിയ തീപിടിത്തമുണ്ടായി, 2018-ല്‍ ഒരു വിനോദ റൈഡിനുണ്ടായ അപകടം സുരക്ഷാ നടപടികള്‍ കൂടുതല്‍ കര്‍ശനമാക്കാന്‍ കാരണമായി.

2020-ല്‍ മഹാമാരി കാരണം ഗ്ലോബല്‍ വില്ലേജ് സീസണ്‍ വെട്ടിച്ചുരുക്കിയെങ്കിലും, പെട്ടെന്ന് തന്നെ തിരിച്ചെത്തി. കോണ്‍ടാക്റ്റ്ലെസ് പെയ്മെന്റ് സംവിധാനങ്ങളും വീതിയുള്ള നടപ്പാതകളും ഒരുക്കി പുതിയ മാറ്റങ്ങള്‍ സ്വീകരിച്ചു.

അതിന് ശേഷം സന്ദര്‍ശകരുടെ എണ്ണം കുതിച്ചുയര്‍ന്നു. 28-ാം സീസണില്‍ 10 ദശലക്ഷം സന്ദര്‍ശകരും, 29-ാം സീസണില്‍ 10.5 ദശലക്ഷം സന്ദര്‍ശകരും എത്തി റെക്കോര്‍ഡുകള്‍ ഭേദിച്ചു. ഓരോ സീസണിലും 40,000-ല്‍ അധികം കലാപ്രകടനങ്ങളാണ് നടക്കുന്നത്.

പോപ്പ് താരങ്ങള്‍, പ്രാദേശിക കലാകാരന്മാര്‍, അപ്രതീക്ഷിത അതിഥികള്‍ തുടങ്ങിയവര്‍ പങ്കെടുക്കുന്ന സംഗീത പരിപാടികള്‍ക്ക് ഗ്ലോബല്‍ വില്ലേജ് ഒരു പ്രധാന വേദിയായി മാറുകയും ചെയ്തു.