റിയാദ്: കേരള എഞ്ചിനിയേഴ്സ് ഫോറം റിയാദ് ചാപ്റ്ററിന്റെ ആഭിമുഖ്യത്തില് സാങ്കേതിക സെമിനാര് സംഘടിപ്പിച്ചു. ആര്ട്ടിഫിഷ്യല് ഇന്റലിജന്സിന്റെയും ഓട്ടോമേഷന് സാങ്കേതിക വിദ്യകളും പ്രോജക്റ്റുകളില് ചെലുത്തുന്ന സ്വാധീനം എന്ന വിഷയത്തിലായിരുന്നു സെമിനാര്. റിയാദ്ലെ റാഡിസണ് എയര്പോര്ട്ട് ഹോട്ടല് ഓഡിറ്റോറിയത്തില് നടന്ന പരിപാടിയില് നിരവധി ഫോറം അംഗങ്ങള് പങ്കെടുത്തു. ഡോക്ടര് അബ്ദുള്നാസര് സെമിനാര് പ്രബന്ധം അവതരിപ്പിച്ചു.
ആര്ട്ടിഫിഷ്യല് ഇന്റലിജന്സിന്റെ (എ ഐ) നിലവിലെ പരിമിതികളും അതേ സമയം അതിന്റെ കഴിവുകളും അദ്ദേഹം വിശദീകരിച്ചു. ആര്ട്ടിഫിഷ്യല് ഇന്റലിജന്സിന്റെ സഹായത്തോടെ ഭാവി സാങ്കേതിക വിദ്യകളില് അധിഷ്ഠിതമായ എഞ്ചിനീയറിംഗ് നിര്മാണ പ്രവര്ത്തികളുടെ സാധ്യതകള് സെമിനാറില് അവതരിപ്പിച്ചു. നവാഗത എ ഐ ആപ്പ് ആയ ജെമിനിയെ കുറിച്ച് മഹറൂഫ് ശൈലബുദ്ദീന് സംസാരിച്ചു. കൂടാതെ ജെന് എ ഐ വിഷയത്തെ പറ്റി അന്ഫസ് ഹസനും മൈക്രോസോഫ്റ്റ് എക്സലില് ആര്ട്ടിഫിഷ്യല് ഇന്റലിജന്സിന്റെ പ്രാവര്ത്തിക വശങ്ങളെക്കുറിച്ച് അഫ്താബുറഹ്മാനും സംസാരിച്ചു.
ചടങ്ങില് കെ ഇ എഫ് എക്സിക്യൂട്ടീവ് അംഗം സുബിന് റോഷന് സ്വാഗതം പറഞ്ഞു. കെ ഇ എഫ് ന്റെ നാള് വഴികളും പ്രവര്ത്തനങ്ങളും വൈസ് പ്രസിഡന്റ് ആഷിക് പാണ്ടികശാല അധ്യക്ഷ പ്രസംഗത്തില് വിശദീകരിച്ചു. സെമിനാര് അവതാരകര്ക്ക് നൗഷാദലി കായല്മടത്തില് മെമന്റോ നല്കി. ഷാഹിദ് നന്ദി പറഞ്ഞു.
Related News
