കൊച്ചി: തനിക്ക് ലഭിച്ച ദാദാസാഹേബ് ഫാല്ക്കെ അവാര്ഡ് മലയാള സിനിമക്ക് സമര്പ്പിക്കുന്നുവെന്ന് നടന് മോഹന്ലാല്. ഇന്ത്യന് സിനിമയിലെ ഏറ്റവും വലിയ അവാര്ഡ് മലയാള സിനിമക്ക് ലഭിച്ചതില് വലിയ സന്തോഷം. മലയാള സിനിമക്കുള്ള അവാര്ഡായാണ് താനിതിനെ കരുതുന്നതെന്നും കൊച്ചിയില് വാര്ത്താസമ്മേളനത്തില് അദ്ദേഹം പറഞ്ഞു.
'48 വര്ഷത്തെ സിനിമാ ജീവിതത്തില് ലഭിച്ച ഏറ്റവും വലിയ പുരസ്കാരം. ഒരുപാട് മഹാരഥന്മാര് നടന്നുപോയ വഴിയിലൂടെയാണ് ഞാന് സഞ്ചരിക്കുന്നത്. മുമ്പ് അവാര്ഡ് ലഭിച്ചതെല്ലാം മഹാരഥന്മാര്ക്കാണ്. അതിന്റെ ഭാഗമാവാന് കഴിഞ്ഞതില് വലിയ നന്ദി', മോഹന്ലാല് പറഞ്ഞു.
'അവാര്ഡ് മലയാള സിനിമയ്ക്ക് സമര്പ്പിക്കുന്നു. 48 വര്ഷമായി എന്നോടൊപ്പം സഞ്ചരിച്ച പലരും ഇപ്പോഴില്ല. അവരെ ഈ നിമിഷം ഓര്ക്കുന്നു. എല്ലാവരും കൂടെ ചേര്ന്നാണ് മോഹന്ലാല് എന്ന നടനുണ്ടായത്. അവര്ക്കെല്ലാം നന്ദി, ഇതില്ക്കൂടുതല് എന്താണ് പറയേണ്ടത്', മോഹന്ലാല് ചോദിച്ചു.
'ഒന്നാമത്തേയോ രണ്ടാമത്തേയോ മലയാളി എന്നുള്ളതല്ല, ഇന്ത്യന് സിനിമയിലെ ഏറ്റവും വലിയ അവാര്ഡ് മലയാള സിനിമക്ക് ലഭിച്ചതില് വലിയ സന്തോഷം. മലയാള സിനിമയ്ക്കുള്ള അവാര്ഡായാണ് ഞാന് കരുതുന്നത്', അദ്ദേഹം കൂട്ടിച്ചേര്ത്തു.
Related News
