ജിദ്ദ: സൗദി അറേബ്യയിലെ പ്രമുഖ റിയല്‍ എസ്റ്റേറ്റ് ഡെവലപ്‌മെന്റ് കമ്പനിയായ ദാര്‍ അല്‍ അര്‍കാന്‍ റിയല്‍ എസ്റ്റേറ്റ് ഡെവലപ്‌മെന്റ് കമ്പനി, ജിദ്ദയില്‍ 10 ലക്ഷം ചതുരശ്ര മീറ്റര്‍ വരുന്ന ഭൂമിയുടെ ഉടമസ്ഥാവകാശം ഏറ്റെടുത്തു. 4.4 ബില്യണ്‍ സൗദി റിയാലാണ് ഈ ഭൂമിയുടെ മൂല്യം. കന്‍സി അറേബ്യ, സ്വകാര്യ നിക്ഷേപകര്‍ എന്നിവരുമായി സഹകരിച്ചാണ് കമ്പനി ഈ ഇടപാട് പൂര്‍ത്തിയാക്കിയത്.

സൗദി സ്റ്റോക്ക് എക്സ്ചേഞ്ചായ 'തദാവുലി'ല്‍ കമ്പനി ഇന്ന് പുറത്തിറക്കിയ പ്രസ്താവന അനുസരിച്ച്, ഭൂമിയുടെ 80% ഉടമസ്ഥാവകാശം ദാര്‍ അല്‍ അര്‍കാനാണ്. ജിദ്ദയുടെ ചരിത്രത്തിലെ ഏറ്റവും വലിയ റിയല്‍ എസ്റ്റേറ്റ് ഇടപാടാണ് ഇതെന്നും പ്രസ്താവനയില്‍ പറയുന്നു.

പ്രധാനപ്പെട്ട നാല് റോഡുകളുടെ സമീപത്താണ് 'ഓര്‍ക്കിഡ് ലാന്‍ഡ്' എന്ന് പേരിട്ട ഈ പ്രോജക്ടിന്റെ സ്ഥാനം. ഇതില്‍ ഏറ്റവും പ്രധാനം ഫോര്‍മുല 1-ന് എതിര്‍വശത്തുള്ള കിംഗ് അബ്ദുല്‍ അസീസ് റോഡും റെഡ് സീ മാളിന് മുന്നിലുള്ള റോഡുകളുമാണ്.

നടപ്പ് സാമ്പത്തിക വര്‍ഷത്തിലും വരും വര്‍ഷങ്ങളിലും ഈ ഇടപാട് ദാര്‍ അല്‍ അര്‍കാന് അനുകൂലമായ സാമ്പത്തിക നേട്ടമുണ്ടാക്കുമെന്ന് കമ്പനി പ്രതീക്ഷിക്കുന്നു. 1994-ല്‍ സ്ഥാപിതമായ ദാര്‍ അല്‍ അര്‍കാന്‍ സൗദി അറേബ്യയിലെ ഏറ്റവും വലിയ റിയല്‍ എസ്റ്റേറ്റ് ഡെവലപ്‌മെന്റ് കമ്പനികളിലൊന്നാണ്. 2007-ല്‍ സൗദി സ്റ്റോക്ക് എക്സ്ചേഞ്ചില്‍ ഈ കമ്പനി ലിസ്റ്റ് ചെയ്യപ്പെട്ടു.

റെസിഡന്‍ഷ്യല്‍, കൊമേഴ്സ്യല്‍ റിയല്‍ എസ്റ്റേറ്റ് പ്രോജക്ടുകള്‍ വികസിപ്പിക്കുക, റെസിഡന്‍ഷ്യല്‍, കൊമേഴ്സ്യല്‍ വസ്തുവകകള്‍ വില്‍ക്കുക, അതുപോലെ തന്നെ വസ്തുവകകള്‍ കൈകാര്യം ചെയ്യുകയും പാട്ടത്തിന് നല്‍കുകയും ചെയ്യുക എന്നിവയാണ് ദാര്‍ അല്‍ അര്‍കാനിന്റെ പ്രധാന പ്രവര്‍ത്തനങ്ങള്‍.