കൊച്ചി: കേരളത്തില്‍ സ്വര്‍ണവില വീണ്ടും കൂടി പുതിയ റെക്കോര്‍ഡിലേക്ക്. ഗ്രാമിന് 115 രൂപയുടെ വര്‍ധനയാണ് ഇന്നു ഉണ്ടായത്. ഇതോടെ ഒരു ഗ്രാം സ്വര്‍ണത്തിന്റെ വില 10,480 രൂപയായി.് പവന് 920 രൂപയുടെ വര്‍ധനവുണ്ടായി. പവന്റെ വില 83,000 കടന്ന് 83,840 രൂപയായി. ആഗോള വിപണിയിലും സ്വര്‍ണവില റെക്കോഡിലാണ്. 18 കാരറ്റ് സ്വര്‍ണത്തിന്റെ വില ഗ്രാമിന് 8615 രൂപയായി ഉയര്‍ന്നു.

സ്‌പോട്ട് ഗോള്‍ഡ് വില 3,743.39 ഡോളറായാണ് ഉയര്‍ന്നത്. റെക്കോഡായ 3,759 ഡോളറായി ഉയര്‍ന്നതിന് ശേഷം വിലയില്‍ നേരിയ ഇടിവ് രേഖപ്പെടുത്തുകയാണ്. യു.എസ് ഗോള്‍ഡ് ഫ്യൂച്ചര്‍ നിരക്ക് 0.1 ശതമാനം ഉയര്‍ന്ന് 3,779 ഡോളറായി. ഫെഡറല്‍ റിസര്‍വ് വായ്പ പലിശനിരക്ക് കുറക്കാനുള്ള സാധ്യതയും സ്വര്‍ണവിലയെ സ്വാധീനിക്കുന്നുണ്ട്.

കഴിഞ്ഞ ദിവസം രണ്ട് തവണ സ്വര്‍ണത്തിന്റെ വില വര്‍ധിച്ചിരുന്നു. രാവിലെ 340 രൂപ വര്‍ധിച്ച് പവന്റെ വില 82,560ലെത്തി സര്‍വകാല റെക്കോഡിലെത്തിയിരുന്നു. തുടര്‍ന്ന് കഴിഞ്ഞ ദിവസം ഉച്ചക്കു ശേഷവും സ്വര്‍ണവില വര്‍ധിച്ചു. ഗ്രാമിന് 45 രൂപയുടെ വര്‍ധനവാണ് രേഖപ്പെടുത്തിയത്. ഇതോടെ ഒരു ഗ്രാമിന്റെ വില 10,365 രൂപയായി വര്‍ധിച്ചു. പവന് 360 രൂപ വര്‍ധിച്ച് 82,920 രൂപയുമായി.

ഡോളറിനെതിരെ രൂപ വന്‍ തകര്‍ച്ചയെ നേരിടുകയാണ്. 18 പൈസ നഷ്ടമാണ് രൂപക്ക് ഇന്നുണ്ടായത്. 88.50ത്തിലാണ് രൂപ ഇന്ന് വ്യാപാരം തുടങ്ങിയത്. കഴിഞ്ഞ ദിവസം 88.32ലായിരുന്നു രൂപ വ്യാപാരം അവസാനിപ്പിച്ചത്.