ജിദ്ദ-കാണികളെ വിസ്മയിപ്പിച്ച് എഐ മാവേലി, പരിപാടികള് നിയന്ത്രിക്കാന് എ.ഐ അവതാറുകള്...എല്ലാ കൊല്ലത്തേയും പോലെ പുതുമകളുമായി കേരള എഞ്ചിനീയര്സ് ഫോറം (കെ.ഇ.എഫ്) ഈ വര്ഷത്തെ ഓണാഘോഷവും ഗംഭീരമാക്കി. എഐ മാവേലിയായിരുന്നു ഇത്തവണത്തെ ആകര്ഷണം. നിര്മിത ബുദ്ധിയുടെ പുതിയ കാലത്ത്, ഇനിയൊന്നും എഐയില്നിന്ന് മുക്തമല്ലെന്ന ഓര്മപ്പെടുത്തലായിരുന്നു എഐ മാവേലിയിലൂടെ കാണികള്ക്ക് ലഭിച്ച സന്ദേശം. ഒപ്പം, സാങ്കേതിക വിദ്യകള്ക്കപ്പുറം ഒരുമയുടെ വേദികളെ സാംസ്കാരിക തനിമ കൈവെടിയാതെ നെഞ്ചോട് ചേര്ക്കണമെന്ന സന്ദേശവും നല്കി.
അത്തപ്പൂക്കളം, ഓണ സദ്യ, പായസ മത്സരം, കുട്ടികള്ക്കുള്ള കളറിംഗ് മത്സരങ്ങള്, കുട്ടികളുടെ സൗദി നാഷണല് ഡേ പരേഡ്, എഐ ഫോട്ടോബൂത്ത്, കഹൂത് ക്വിസ്, ട്രിലോജി ടീം ഒരുക്കിയ ഓര്ക്കസ്ട്ര എന്നിവ പരിപാടിക്ക് നിറക്കൂട്ട് നല്കി.
വെള്ളിയാഴ്ച ഉച്ചക്ക് ശേഷം തുടങ്ങിയ ഓണം പരിപാടിയില് കെ.ഇ.എഫ് മെമ്പര്മാരും കുടുംബാംഗങ്ങളും പങ്കെടുത്തു. കണ്വീനര് അസ്ബീര്, വിജിഷ, പ്രസിഡന്റ് സെഫുവാന്, സെക്രട്ടറി ആദില്, ട്രഷറര് അബ്ദുല് മജീദ് എന്നിവര്ക്ക് പുറമെ മുഴുവന് എക്സിക്യൂട്ടീവ് അംഗങ്ങളും വൈവിധ്യമാര്ന്ന പരിപാടികള്ക്ക് നേതൃത്വം നല്കി. എഐ പ്രോഗ്രാമിന് പിന്നണിയില് പ്രവര്ത്തിച്ച ടെക്നിക്കല് ടീമിനെ പ്രത്യേകം ആദരിച്ചു.
