ജിദ്ദ- വ്യവസായ പ്രമുഖനും കേരളത്തില് വേരുകളുളള സൗദി പൗരനുമായ അബൂ റയ്യാന് എന്ന ശൈഖ് മുഹമ്മദ് സഈദ് മലൈബാരി (70) അന്തരിച്ചു. ഇന്ന് രാവിലെ സുബഹി നമസ്കാരത്തിന് ശേഷം ഹൃദയാഘാതം സംഭവിക്കുകയായിരുന്നു.
മുഹമ്മദ് സഈദ് കമേഴ്സ്യല് കോര്പറേഷന്റെ (മൊസാകോ) ഉടമയും മാനേജിംഗ് ഡയറക്ടറുമായ അബൂറയ്യാന്, ബലദിലെ കശ്മീരി ടെക്സ്റ്റയില്സിന്റേയും ജിദ്ദയിലെ റെയ്മണ്ട്സ് ഷോറൂമിന്റേയും ഉടമയുമായിരുന്നു.
1949 ല് ആലപ്പുഴ ജില്ലയിലെ ആറാട്ടുപുഴയില്നിന്ന് ജിദ്ദയിലെത്തി ബിസിനസ് രംഗത്ത് ശോഭിച്ച സഈദ് മുഹമ്മദ് അലി അബ്ദുല് ഖാദര് മലൈബാരിയാണ് പിതാവ്. 1955 ല് ജിദ്ദ ബലദില് ജനിച്ച അബൂറയ്യാന് കിംഗ് അബ്ദുല് അസീസ് യൂനിവേഴ്സിറ്റിയില്നിന്നാണ് ബിരുദം പൂര്ത്തിയാക്കിയത്. 1980 ല് ബിസിനസിലേക്ക് കടന്നു.
മലയാളി സമൂഹവുമായി അടുത്ത ബന്ധം പുലര്ത്തിയിരുന്ന അബൂറയ്യാന്, മലയാളി സംഘടനകള് സംഘടിപ്പിച്ച പരിപാടികളിലും സംബന്ധിച്ചിരുന്നു. മെയില് ജിദ്ദയില് ജി.ജി.ഐ സംഘടിപ്പിച്ച മലൈബാരി സൗദികളുടെ സംഗമത്തില് മലയാളത്തില് പ്രസംഗിച്ചത് ശ്രദ്ധേയമായി. കേരളത്തിലേക്ക് സ്ഥിരമായി യാത്ര ചെയ്യാറുണ്ടായിരുന്നു. മൂന്ന് ആണ് മക്കളുണ്ട്.
Related News
