ചൈനയിലെ ലോകത്തിലെ ഏറ്റവും ഉയരം കൂടിയ പാലം ഹുവാജിയാങ് ഗ്രാന്‍ഡ് കാന്യണ്‍ പാലം (Huajiang Grand Canyon Bridge) ഗതാഗതത്തിനായി തുറന്നുകൊടുത്തു.
തെക്കുപടിഞ്ഞാറന്‍ ചൈനയിലെ ഗുയിഷോ (Guizhou) പ്രവിശ്യയിലെ ബെയ്പാന്‍ നദിക്കു കുറുകെയാണ് പാലം നിര്‍മിച്ചിരിക്കുന്നത്. പാലത്തിന്റെ ഡെക്ക് മലയിടുക്കിന്റെ തറയില്‍ നിന്ന് ഏകദേശം 625 മീറ്റര്‍ (2,051 അടി) ഉയരത്തിലാണ് സ്ഥിതി ചെയ്യുന്നത്.

ഈ പാലം തുറന്നതോടെ മലയിടുക്കിന് കുറുകെയുള്ള യാത്രാസമയം രണ്ട് മണിക്കൂറില്‍ നിന്ന് വെറും രണ്ട് മിനിറ്റായി കുറഞ്ഞു. പാലത്തിന് ഏകദേശം 2,890 മീറ്റര്‍ (2.9 കിലോമീറ്റര്‍) നീളമുണ്ട്. ഇതിന് മുമ്പ് ഈ റെക്കോര്‍ഡ് ചൈനയിലെതന്നെ ബെയ്പാന്‍ജിയാങ് പാലത്തിനായിരുന്നു.

ഹുവാജിയാങ് ഗ്രാന്‍ഡ് കാന്യണ്‍ പാലത്തിന്റെ നിര്‍മ്മാണത്തിന് മൂന്നു വര്‍ഷമാണെടുത്തത്. ഏകദേശം 292 മില്യണ്‍ ഡോളര്‍ (ഏകദേശം 2200 കോടി രൂപ) ചെലവഴിച്ചാണ് നിര്‍മാണം. ആഴമേറിയ മലയിടുക്കുകളിലെ നിര്‍മ്മാണ വെല്ലുവിളികള്‍ അതിജീവിക്കാന്‍ ഡ്രോണുകള്‍, അള്‍ട്രാ-സ്‌ട്രോങ്ങ് മെറ്റീരിയലുകള്‍, അത്യാധുനിക സാങ്കേതികവിദ്യകള്‍ എന്നിവ ഉപയോഗിച്ചു. പ്രധാനമായും സ്റ്റീല്‍ ട്രസ്സ് ഗിര്‍ഡര്‍ സസ്‌പെന്‍ഷന്‍ ബ്രിഡ്ജ് രൂപകല്‍പ്പനയാണ് സ്വീകരിച്ചിച്ചുള്ളത്.