ദുബായ്- യാത്രാ നടപടിക്രമങ്ങള്‍ കൂടുതല്‍ വേഗത്തിലാക്കാനും സുരക്ഷാ പരിശോധന ലളിതമാക്കാനുമായി ദുബായ് ഇന്റര്‍നാഷണല്‍ എയര്‍പോര്‍ട്ടില്‍ അത്യാധുനിക 3ഡി ബാഗേജ് സ്‌കാനറുകള്‍ സ്ഥാപിക്കുന്നു. 2026 മെയ് മാസത്തോടെ എല്ലാ ടെര്‍മിനലുകളിലും സ്‌കാനറുകള്‍ സ്ഥാപിക്കുന്നത് പൂര്‍ത്തിയാക്കുമെന്നാണ് വിവരം.

ഈ നൂതന സാങ്കേതികവിദ്യ യാത്രാനുഭവം വലിയ തോതില്‍ മെച്ചപ്പെടുത്തും. 3ഡി സ്‌കാനറുകള്‍ വരുന്നതോടെ യാത്രക്കാര്‍ക്ക് സുരക്ഷാ പരിശോധനയ്ക്കായി ലാപ്‌ടോപ്പുകളും ദ്രാവക വസ്തുക്കളും ബാഗില്‍ നിന്ന് പുറത്തെടുക്കേണ്ട ആവശ്യം വരില്ല. വിശദമായ 3ഡി ചിത്രങ്ങള്‍ ലഭ്യമാക്കുന്ന ഈ സംവിധാനം സുരക്ഷാ മാനദണ്ഡങ്ങള്‍ നിലനിര്‍ത്തിക്കൊണ്ടുതന്നെ പരിശോധന വേഗത്തിലാക്കാന്‍ സഹായിക്കും.

ഇത് സുരക്ഷാ പരിശോധനകള്‍ക്ക് വലിയ വേഗം നല്‍കുകയും കാത്തിരിപ്പ് സമയം കുറയ്ക്കുകയും സുരക്ഷ വര്‍ദ്ധിപ്പിക്കുകയും ചെയ്യുമെന്ന് ദുബായ് എയര്‍പോര്‍ട്ട്സ് ചീഫ് ഓപ്പറേറ്റിങ് ഓഫീസര്‍ മാജിദ് അല്‍ ജോക്കര്‍ പറഞ്ഞു. നിലവില്‍ ടെര്‍മിനല്‍ 3-ല്‍ സ്‌കാനറുകള്‍ സ്ഥാപിക്കുന്ന ജോലികള്‍ നടന്നുകൊണ്ടിരിക്കുകയാണ്.

ലോകത്തിലെ ഏറ്റവും തിരക്കേറിയ അന്താരാഷ്ട്ര യാത്രാ കേന്ദ്രമെന്ന നിലയില്‍, യാത്രക്കാരുടെ തിരക്ക് നിയന്ത്രിക്കുന്നതിനായി ദുബായ് എയര്‍പോര്‍ട്ട് നടത്തുന്ന വിപുലമായ സാങ്കേതിക മുന്നേറ്റങ്ങളുടെ ഭാഗമായാണ് പുതിയ സംവിധാനങ്ങള്‍. 2025-ല്‍ 96 ദശലക്ഷം യാത്രക്കാരെയാണ് വിമാനത്താവളം പ്രതീക്ഷിക്കുന്നത്. യാത്രാശേഷി വര്‍ദ്ധിപ്പിക്കുന്നതിനും തടസ്സമില്ലാത്ത യാത്രാനുഭവം ഉറപ്പാക്കുന്നതിനും ഈ നവീകരണങ്ങള്‍ നിര്‍ണായകമാണ്. യാത്രക്കാരുടെ ഒഴുക്ക് 24 മണിക്കൂര്‍ മുമ്പ് വരെ പ്രവചിക്കാന്‍ കഴിയുന്ന ആര്‍ട്ടിഫിഷ്യല്‍ ഇന്റലിജന്‍സ് സംവിധാനങ്ങള്‍ വിന്യസിക്കുന്നതും, രേഖകള്‍ കാണിക്കാതെ തന്നെ ഇമിഗ്രേഷന്‍ അതിവേഗം പൂര്‍ത്തിയാക്കാന്‍ സഹായിക്കുന്ന ബയോമെട്രിക് 'റെഡ് കാര്‍പ്പറ്റ്' കോറിഡോറുകള്‍ സ്ഥാപിക്കുന്നതും ഈ സാങ്കേതികവിദ്യാ സംയോജനത്തിന്റെ ഭാഗമാണ്.