ദോഹ: ലോകമെങ്ങുമുള്ള പ്രമുഖ കാലാവസ്ഥ പ്രവര്‍ത്തകരുടെ പട്ടികയില്‍ ഖത്തര്‍ ആസ്ഥാനമായി പ്രവര്‍ത്തിക്കുന്ന പരിസ്ഥിതി പ്രവര്‍ത്തകന്‍ നീഷാദ് ഷാഫിയും. ആഗോള കാലാവസ്ഥ നേതൃപട്ടികയായ 'ദ ഇന്‍ഡിപെന്‍ഡന്റ് ക്ലൈമറ്റ് 100' ലാണ് നീഷാദ് ഷാഫിയെ ഉള്‍പ്പെടുത്തിയിരിക്കുന്നത്. പരിസ്ഥിതി പ്രവര്‍ത്തനങ്ങള്‍ ഏറ്റെടുത്ത് നടപ്പാക്കുന്നതിലെ പ്രതിബദ്ധത കണക്കിലെടുത്താണ് അംഗീകാരം.

ഖത്തര്‍ ആസ്ഥാനമായുള്ള പരിസ്ഥിതി പ്രവര്‍ത്തകനും അറബ് യൂത്ത് ക്ലൈമറ്റ് മൂവ്മെന്റിന്റെ (AYCM) സഹസ്ഥാപകനുമാണ് നീഷാദ് ഷാഫി. ഇന്‍ഡിപെന്‍ഡന്റ് ക്ലൈമറ്റ് 100 പട്ടികയില്‍ വീണ്ടും ഇടം നേടിയതില്‍ അഭിമാനമുണ്ടെന്നും വിനയപൂര്‍വം അംഗീകാരം ഏറ്റുവാങ്ങുകയാണെന്നും നീഷാദ് ഷാഫി പ്രതികരിച്ചു.