ജയ്പൂര്- രാജസ്ഥാനിലെ ജയ്പൂരിലുള്ള സവായ് മാന് സിംഗ് (എസ്.എം.എസ്) ആശുപത്രി ട്രോമാ സെന്ററിലെ ഐ.സി.യുവില് ഞായറാഴ്ച രാത്രി വൈകി ഉണ്ടായ വന് തീപിടിത്തത്തില് ആറ് രോഗികള് മരിച്ചു.
രാത്രി 11:20-ഓടെ ട്രോമാ സെന്ററിലെ ന്യൂറോ ഐ.സി.യു വാര്ഡിലെ സ്റ്റോര് റൂമിലാണ് തീ ആദ്യം കണ്ടതെന്നാണ് ആശുപത്രി അധികൃതര് നല്കുന്ന വിവരം. മിനിറ്റുകള്ക്കകം തീ പടര്ന്ന് 11 കിടക്കകളുള്ള ഐ.സി.യു വാര്ഡ് പൂര്ണമായി കത്തിനശിച്ചു. ഷോര്ട്ട് സര്ക്യൂട്ടാണ് തീപിടിത്തത്തിന് കാരണമായതെന്നാണ് പ്രാഥമിക നിഗമനം.
സംഭവസമയത്ത് വാര്ഡ് മുഴുവന് പുക നിറഞ്ഞെന്നും, രോഗികളെ കണ്ടെത്താന് പോലും സാധിച്ചില്ലെന്നും ബന്ധുക്കള് പറയുന്നു. 'വാര്ഡ് നിറയെ പുകയായിരുന്നു, എന്റെ അമ്മയെ കണ്ടെത്താന് എനിക്ക് കഴിഞ്ഞില്ല,' എന്ന് മരിച്ച ഒരു രോഗിയുടെ മകന് പറഞ്ഞു. അപകടം നടന്നപ്പോള് ആശുപത്രി ജീവനക്കാര് സ്ഥലത്തുണ്ടായിരുന്നില്ലെന്ന് ആരോപിച്ച് മരിച്ചവരുടെ ബന്ധുക്കള് ആശുപത്രിക്ക് പുറത്ത് പ്രതിഷേധിച്ചു.
എന്നാല്, വാര്ഡ് ജീവനക്കാരും പോലീസുകാരും ചേര്ന്ന് ജീവന് പണയപ്പെടുത്തി രോഗികളെ രക്ഷിക്കാന് ശ്രമിച്ചതായി ചില ആശുപത്രി ജീവനക്കാര് പ്രതികരിച്ചു. രക്ഷാപ്രവര്ത്തനത്തിനിടെ തങ്ങള്ക്കും പൊള്ളലേല്ക്കുകയും പുക ശ്വസിക്കുകയും ചെയ്തതായി അവര് പറഞ്ഞു. ദുരന്തത്തില് പ്രധാനമന്ത്രി നരേന്ദ്രമോഡി അനുശോചിച്ചു.
Related News
