ജിദ്ദ: വിദ്യാര്ത്ഥികള്ക്കും രക്ഷിതാക്കള്ക്കും ഉന്നത വിദ്യാഭ്യാസ-പരിശീലന മേഖലകളിലെ പുതിയ സാധ്യതകള് പരിചയപ്പെടുത്തി ജിദ്ദ എക്സിബിഷന് ആന്ഡ് കണ്വെന്ഷന്സ് സെന്ററില് നടക്കുന്ന മിഡില് ഈസ്റ്റ് വിദ്യാഭ്യാസ-പരിശീലന പ്രദര്ശനത്തിന് ഇന്നു തിരിശ്ശീല വീഴും. ജിദ്ദ ചേംബര് സംഘടിപ്പിച്ച ത്രിദിന പരിപാടിയില് സ്വദേശീയവും അന്തര്ദ്ദേശീയവുമായ നിരവധി വിദ്യാഭ്യാസ-പരിശീലന സ്ഥാപനങ്ങളാണ് പങ്കെടുക്കുന്നത്.
ഈ പ്രദര്ശനം രാജ്യത്തെ വിദ്യാഭ്യാസ പ്രക്രിയക്ക് പുതിയ ഉണര്വ് നല്കുന്നതായും വിദ്യാര്ത്ഥികള്ക്ക് പുതിയ ചക്രവാളങ്ങള് തുറക്കുന്നതിന് സഹായകമാവുമെന്നും സംഘാടകര് പറഞ്ഞു. സര്വകലാശാലകള്, കോളേജുകള്, പ്രൊഫഷണല് പരിശീലന സ്ഥാപനങ്ങള്, വിദ്യാഭ്യാസ സാങ്കേതികവിദ്യാ ദാതാക്കള് എന്നിവരെയെല്ലാം ഒരേ വേദിയില് ഒരുമിച്ചു കൊണ്ടുവരുന്ന ഒരു പ്രധാന പ്ലാറ്റ്ഫോമായാണ് ഈ പരിപാടി ശ്രദ്ധേയമാകുന്നത്. വിദ്യാഭ്യാസ സേവന ദാതാക്കളും വിദ്യാര്ത്ഥികളും രക്ഷിതാക്കളും തമ്മില് നേരിട്ടുള്ള ആശയവിനിമയം സാധ്യമാക്കുക എന്നതാണ് പ്രദര്ശനത്തിന്റെ പ്രധാന ലക്ഷ്യം.
വൈവിധ്യമാര്ന്ന അക്കാദമിക്, പരിശീലന പരിപാടികള്, തൊഴിലധിഷ്ഠിത കോഴ്സുകള്, ഏറ്റവും പുതിയ വിദ്യാഭ്യാസ സാങ്കേതികവിദ്യകള് എന്നിവയെല്ലാം ഇവിടെ പരിചയപ്പെടുത്തുന്നുണ്ട്. രാജ്യത്തെ വിദ്യാഭ്യാസത്തിന്റെ പുരോഗതിക്ക് സംഭാവന നല്കുന്ന മികച്ച സംരംഭങ്ങളാണ് പ്രദര്ശനത്തിന്റെ മുഖ്യ ആകര്ഷണം.
വിദ്യാഭ്യാസ-പരിശീലന മേഖലകളില് താല്പ്പര്യമുള്ള വിദഗ്ദ്ധര്, വിവിധ രാജ്യങ്ങളിലെ നയതന്ത്ര സംഘാംഗങ്ങള്, സാങ്കേതികവിദ്യാ രംഗത്തെ പ്രൊഫഷണലുകള് തുടങ്ങി നിരവധി പേര് പരിപാടിയില് പങ്കെടുക്കുന്നതായി സംഘാടകര് അറിയിച്ചു.
Related News
