മസ്കത്ത്: ഒമാനിലെ പ്രവാസി കുടുംബങ്ങളെയും ജീവനക്കാരെയും ബാധിക്കുന്ന വിസ നിയമത്തില് സുപ്രധാന മാറ്റം. കുടുംബ വിസയും കുട്ടികളുടെ ഐഡി കാര്ഡും ജീവനക്കാരുടെ ഐഡി കാര്ഡും പുതുക്കുന്നതിന് ഇനി മുതല് കൂടുതല് രേഖകള് ഹാജരാക്കണം. കഴിഞ്ഞ ദിവസം മുതലാണ് ഈ പരിഷ്കാരങ്ങള് നടപ്പിലാക്കി തുടങ്ങിയതെങ്കിലും, ഇത് സംബന്ധിച്ച് ഔദ്യോഗിക പ്രഖ്യാപനം ഇതുവരെ ഉണ്ടായിട്ടില്ല.
കുട്ടികളുടെ ഐഡി കാര്ഡ് പുതുക്കുന്നതിന് ഒറിജിനല് പാസ്പോര്ട്ട്, വിസ പേജ് പകര്പ്പ്, ജനന സര്ട്ടിഫിക്കറ്റ് (വിദേശകാര്യ മന്ത്രാലയം സാക്ഷ്യപ്പെടുത്തിയിരിക്കണം) എന്നീ രേഖകള് ഹാജരാക്കണം. പുതുക്കുന്ന സമയത്ത് മാതാപിതാക്കള് ഇരുവരും ഹാജരാകണം. പങ്കാളിയുടെ വിസ പുതുക്കുന്നതിന് വിവാഹ സര്ട്ടിഫിക്കറ്റ് (വിദേശകാര്യ മന്ത്രാലയം സാക്ഷ്യപ്പെടുത്തിയിരിക്കണം), ഭാര്യാഭര്ത്താക്കന്മാരുടെ ഒറിജിനല് പാസ്പോര്ട്ടുകള് എന്നിവ ഹാജരാക്കണം. ഭര്ത്താവും ഭാര്യയും ഹാജരാകണം.
പുതിയ നിയമങ്ങള് നിലവില് വന്നതോടെ പ്രവാസികള് അവരുടെ രേഖകളെല്ലാം കൃത്യമായി സൂക്ഷിക്കുകയും, സമയബന്ധിതമായി സാക്ഷ്യപ്പെടുത്തുകയും ചെയ്യേണ്ടത് അത്യാവശ്യമായി വന്നിരിക്കുകയാണ്.
Related News
