കരിപ്പൂര്: കേരള സംസ്ഥാന ഹജ്ജ് കമ്മിറ്റി മുഖേന 2026 ലെ ഹജ്ജിന് പുറപ്പെടുന്നവര്ക്ക് മൂന്ന് ഘട്ടങ്ങളിലായി സാങ്കേതിക പരിശീലന ക്ലാസുകള്ക്ക് നേതൃത്വം നല്കുന്ന ഫാക്കല്റ്റിമാര്ക്ക് ഓറിയന്റേഷന് പ്രോഗ്രാം സംഘടിപ്പിച്ചു. 2025 ഓഗസ്റ്റില് നടത്തിയ ഇല്ലുമിനേറ്റ് വര്ക്ക്ഷോപ്പിന്റെ തുടര്ച്ചയായാണ് ഹജ്ജ് ഹൗസില് പരിപാടി ഒരുക്കിയത്. സംസ്ഥാനത്തിന്റെ വിവിധ ജില്ലകളില് നിന്ന് തിരഞ്ഞെടുക്കപ്പെട്ട 35 അംഗങ്ങളാണ് ഓറിയന്റേഷനില് പങ്കെടുത്തത്. പരിപാടി ഹജ്ജ് കമ്മിറ്റി ചെയര്മാന് ഡോ. ഹുസൈന് സഖാഫി ചള്ളിക്കോട് ഉദ്ഘാടം ചെയ്തു.
ഹജ്ജ് കമ്മിറ്റി അംഗം ഒ.വി ജാഫര് അധ്യക്ഷതവഹിച്ചു. ഹജ്ജ് കമ്മിറ്റി അംഗങ്ങളായ മുഹമ്മദ് ഷക്കീര് ഈരാറ്റുപേട്ട, നൂര് മുഹമ്മദ് നൂര്ഷ, അഡ്വ. പി. മൊയ്തീന്കുട്ടി, പി പി. മുഹമ്മദ് റാഫി, ഷംസുദ്ദീന് അരിഞ്ചിറ, അസിസ്റ്റന്റ് സെക്രട്ടറി ജാഫര് കക്കൂത്ത്, നോഡല് ഓഫീസര് അസ്സയിന് പി കെ, ട്രെയിനര് ഡോ.അബ്ദുള്ളക്കുട്ടി എപി, കെ ടി അമാനുള്ള മാസ്റ്റര് എന്നിവര് പരിപാടികള്ക്ക് നേതൃത്വം നല്കി
വിവിധ ജില്ല, മണ്ഡലം കേന്ദ്രങ്ങളില് ഇതിനകം ഒന്നാം ഘട്ടമായി സംഘടിപ്പിക്കപ്പെട്ട ക്ലാസുകള്ക്ക് നേതൃത്വം നല്കിയ ഫാക്കല്റ്റിമാരുടെ വിശദമായ അവലോകനം, രണ്ടാംഘട്ട ക്ലാസുകള്ക്കുള്ള ഒരുക്കങ്ങള്, മോഡ്യൂള് പ്രിപ്പറേഷന്, ഇഫക്റ്റീവ് പബ്ലിക് ട്രെയിനിങ് ഇവാലുവേഷന് ഉള്പ്പെടെ വിവിധ സെഷനുകളില് വിശാലമായ അവതരണങ്ങളും അവലോകനങ്ങളും ഓറിയന്റേഷന് ഭാഗമായി സംഘടിപ്പിച്ചു.
രണ്ടാംഘട്ട ക്ലാസുകള്ക്ക് മുന്നോടിയായി നടത്തുന്ന വിവിധ പരിപാടികളുടെ ആസൂത്രണങ്ങളും നിര്വഹിച്ചു. മികച്ച ട്രെയിനിങ് മാനുവലുകളുടെ മൂല്യനിര്ണയം, സമ്മാനദാനം എന്നിവയും ചടങ്ങിന്റെ ഭാഗമായി നടത്തി. ഇതിനോടകം തിരഞ്ഞെടുക്കപ്പെട്ടവരും വെയ്റ്റിംഗ് ലിസ്റ്റിലെ 6000 വരെയുള്ളവര്ക്കുമാണ് ഒന്നാം ഘട്ട ക്ലാസുകള് പൂര്ത്തിയാക്കിയത്. ഹാജിമാര്ക്ക് ആവശ്യമായ നിര്ദ്ദേശങ്ങള് നല്കുന്നതിനും സഹായങ്ങള് ഒരുക്കുന്നതിനും ട്രെയിനിങ് ഓര്ഗനൈസര്മാരും ഫാക്കല്റ്റി അംഗങ്ങളും പ്രവര്ത്തിച്ചു വരികയാണ്. അടുത്തു നടക്കുന്ന രണ്ടാം ഘട്ട സാങ്കേതിക പരിശീലന ക്ലാസുകളില് ഏറെ ഫലപ്രദമായ ഇടപെടലുകള്ക്ക് പരിശീലനം സിദ്ധിച്ച ഫാക്കല്റ്റി അംഗങ്ങള് നേതൃത്വം നല്കും.
Related News
