നെടുമ്പാശ്ശേരി: കൊച്ചി അന്താരാഷ്ട്ര വിമാനത്താവളത്തിലെത്തിയ വിമാനത്തിന്റെ ശുചിമുറിയില് നിന്നും ഉപേക്ഷിക്കപ്പെട്ട നിലയില് അനധികൃതമായി കടത്താന് ശ്രമിച്ച സ്വര്ണം കണ്ടെത്തി. ഡയറക്ടറേറ്റ് ഓഫ് റവന്യൂ ഇന്റലിജന്സ് (ഡി.ആര്.ഐ) വിഭാഗം നടത്തിയ മിന്നല് പരിശോധനയിലാണ് 625 ഗ്രാം സ്വര്ണം പ്രഷര് പമ്പില് ഒളിപ്പിച്ച നിലയില് കണ്ടെത്തിയത്. റാസല്ഖൈമയില് നിന്നും വന്ന ഇന്ഡിഗോ വിമാനത്തിലെ ശുചിമുറിയിലാണ് സ്വര്ണം കടത്തിയത്.
നെടുമ്പാശ്ശേരിയിലെത്തിയ വിമാനത്തിനകത്ത് ഡി.ആര്.ഐ ഉദ്യോഗസ്ഥര് പരിശോധന നടത്തുകയായിരുന്നു. ഇതോടെ ഈ വിമാനത്തിലെത്തിയ 181 ഓളം യാത്രക്കാര് വലഞ്ഞു. സ്വര്ണം ആരാണ് കൊണ്ടുവന്നതെന്നറിയാന് ഓരോ യാത്രക്കാരെയും ഡി.ആര്.ഐ ഉദ്യോഗസ്ഥര് പ്രത്യേകം ചോദ്യം ചെയ്തു. എന്നാല് സ്വര്ണക്കടത്തിന് ശ്രമിച്ച യാത്രക്കാരനെ കണ്ടെത്താനായില്ല. വിമാനത്തിലെ ശുചീകരണ തൊഴിലാളികളെ കേന്ദ്രീകരിച്ചും വിശദമായ അന്വേഷണം ആരംഭിച്ചിട്ടുണ്ട്. വിമാനത്തിനകത്ത് ഉപേക്ഷിച്ച സ്വര്ണം ശുചീകരണ തൊഴിലാളികളെയോ ആഭ്യന്തര യാത്രക്കാരെയോ ഉപയോഗിച്ച് പുറത്തെത്തിക്കാനായിരുന്നു പദ്ധതിയെന്നാണ് സംശയിക്കുന്നത്.
Related News
