ദമാം: കൊല്ലം പ്രീമിയര് ലീഗിന്റെ ജീവകാരുണ്യ മേഖലയിലെ മാതൃകാ സേവനത്തിനുള്ള പ്രഥമ പുരസ്കാരം വെളിയില് നസീറിന്. കര്മ്മ പാതയില് കാരുണ്യ സേവനം ഹൃദയ താളത്തോടൊപ്പം ചേര്ത്ത വ്യക്തിത്വത്തിനുടമയാണ് കൊല്ലം കരുനാഗപ്പള്ളി സ്വദേശിയായ വെളിയില് നസീര്. ജീവിത സ്വപ്നങ്ങളെ ചിട്ടപ്പെടുത്തുന്ന തിരക്കുകള്ക്കിടയിലും സഹജീവികള്ക്കായുള്ള കാരുണ്യം സേവനം കടമയായി ഏറ്റെടുത്ത വ്യക്തിത്വമാണ്. കഴിഞ്ഞ മൂന്നു പതിറ്റാണ്ടായി പ്രവാസ ലോകത്തും നാട്ടിലും നിശബ്ദമായ കാരുണ്യ പ്രവര്ത്തനങ്ങളിലൂടെ മാതൃകയാവുകയാണ് നസീര്.
കഴിഞ്ഞ കുറെ വര്ഷങ്ങളായി പത്തനാപുരം ഗാന്ധിഭവനിലെ നൂറിലധികം വരുന്ന ഭിന്നശേഷിക്കാരായ കുട്ടികളുടെ പൂര്ണ്ണമായ സംരക്ഷണം ഇദ്ദേഹം ഏറ്റെടുത്തിരിക്കുകയാണ്. സമീപകാലത്ത് കരുനാഗപ്പള്ളിയില് ലക്ഷക്കണക്കിന് രൂപ ചിലവഴിച്ച് ഏറ്റവും ആധുനികമായ സംവിധാനങ്ങളോടുകൂടി ഭിന്നശേഷിക്കാരായ കുട്ടികള്ക്കായി തെറാപ്പി സെന്ററും ഇദ്ദേഹം ആരംഭിച്ചു. നിരവധി കാരുണ്യ പ്രവര്ത്തനങ്ങളുടെ പട്ടിക തന്നെ വെളിയില് നസീര് എന്ന പ്രവാസിയുടെ ജീവിതയാത്രയിലുണ്ട്.. ജീവിതാനുഭവങ്ങളുടെ പശ്ചാത്തലത്തില് സഹജീവികളുടെ വേദനകളെയും നൊമ്പരങ്ങളെയും ഹൃദയത്തോട് ചേര്ത്തുവച്ച് കാരുണ്യ സേവനത്തിന്റെ കര്മ്മ പാതയിലൂടെ മുന്നോട്ടുപോകുന്ന വെളിയില് നസീറിന് കൊല്ലം പ്രീമിയര് ലീഗിന്റെ പ്രഥമ പുരസ്കാരം നല്കി ആദരിക്കുന്നതില് അഭിമാനമുണ്ടെന്ന് സംഘാടകര് പറഞ്ഞു.
ഒക്ടോബര് 24 വെള്ളിയാഴ്ച ദമാം ലുലു മാളില് സംഘടിപ്പിക്കുന്ന കൊല്ലം പ്രീമിയര് ലീഗ് സീസണ് ആറിന്റെ ട്രോഫി ആന്ഡ് ജേഴ്സി ലോഞ്ചിംഗ് ചടങ്ങില് ദമാം കൊല്ലം ജില്ലാ പ്രവാസി കൂട്ടായ്മ പൈതൃകവും, കൊല്ലം പ്രീമിയര് ലീഗ് സംഘാടകരും ചേര്ന്ന് നസീറിന് സ്നേഹാദരവ് സമ്മാനിക്കും. നാട്ടില് നിന്നെത്തുന്ന പ്രശസ്ത കലാകാരന്മാരും പ്രവിശ്യയിലെ വിശിഷ്ട അതിഥികളും കൊല്ലം ജില്ലയിലെ പ്രവാസി സൗഹൃദങ്ങളുടെ സംഗമത്തില് പങ്കെടുക്കുമെന്ന് സംഘാടകര് അറിയിച്ചു.
Related News
