ദോഹ: ഖത്തറില്‍ ഇനി വീടോ ഫ്ളാറ്റോ വാങ്ങുന്നവര്‍ക്ക് സന്തോഷവാര്‍ത്ത. 2 ലക്ഷം ഡോളര്‍ (ഏകദേശം 7 ലക്ഷം റിയാല്‍) മൂല്യമുള്ള പ്രോപ്പര്‍ട്ടി വാങ്ങിയാല്‍, ഏതാനും ദിവസങ്ങള്‍ക്കുള്ളില്‍ തന്നെ താമസാവകാശവും ടൈറ്റില്‍ ഡീഡും ലഭിക്കും.

റിയല്‍ എസ്റ്റേറ്റ് റെഗുലേറ്ററി അതോറിറ്റിയുടെ ചെയര്‍മാന്‍ ഖാലിദ് ബിന്‍ അഹമ്മദ് അല്‍ ഒബൈദ്‌ലിയാണ് ഈ വിവരം സ്ഥിരീകരിച്ചത്. മൂന്നാമത് റിയല്‍ എസ്റ്റേറ്റ് ഫോറത്തില്‍ ആയിരിക്കും പുതിയ പദ്ധതി ഔദ്യോഗികമായി പ്രഖ്യാപിക്കുക.

ആഭ്യന്തര, നീതി, തൊഴില്‍ മന്ത്രാലയങ്ങളും ഇന്‍വെസ്റ്റ്‌മെന്റ് പ്രമോഷന്‍ ഏജന്‍സിയും ചേര്‍ന്ന് ഈ പദ്ധതി നടപ്പാക്കും. വാങ്ങുന്നവര്‍ക്ക് പ്രക്രിയ വേഗത്തില്‍ പൂര്‍ത്തിയാക്കാന്‍ എല്ലാം ഒരുമിച്ച് പ്രവര്‍ത്തിക്കുന്നുവെന്നാണ് അല്‍ ഒബൈദ്‌ലി പ്രതികരിച്ചത്. 2025-ലെ എല്ലാ പുതിയ റിയല്‍ എസ്റ്റേറ്റ് പദ്ധതികളും സുരക്ഷിതമാണെന്നും വാങ്ങുന്നവര്‍ക്ക് ഉറപ്പായും റെസിഡന്‍സിയും ടൈറ്റില്‍ ഡീഡും ലഭിക്കുമെന്നും അദ്ദേഹം ഉറപ്പു നല്‍കി. ഈ വര്‍ഷം ഖത്തറിലെ റിയല്‍ എസ്റ്റേറ്റ് വിപണി മികച്ച വളര്‍ച്ചയാണ് രേഖപ്പെടുത്തിയിരിക്കുന്നത്. രണ്ടാം പാദത്തില്‍ മാത്രം 8.9 ബില്യണ്‍ റിയാല്‍ മൂല്യമുള്ള ഇടപാടുകള്‍ നടന്നു. കഴിഞ്ഞ വര്‍ഷത്തേക്കാള്‍ 29.8 ശതമാനം വര്‍ധനവാണിത്. താമസ പദ്ധതികളില്‍ മാത്രം 114 ശതമാനം ഉയര്‍ച്ച ഉണ്ടായി.