റിയാദ്: തലശ്ശേരി മണ്ഡലം വെല്‍ഫെയര്‍ അസോസിയേഷന്‍ റിയാദ് സില്‍വര്‍ ജൂബിലി ആഘോഷങ്ങളുടെ ഭാഗമായി ''അദ്‌നാന്‍ മെഹ്ഫില്‍ '25'' സംഗീത വിരുന്ന് ഒക്ടോബര്‍ 24, വെള്ളിയാഴ്ച, മാര്‍ക്ക് ആന്റ് സേവ്, ഫ്‌ലമിങോ മാള്‍, എക്‌സിറ്റ് 26, മക്ക റോഡ്, റിയാദില്‍ അരങ്ങേറുമെന്ന് സംഘാടകര്‍ വാര്‍ത്താസമ്മേളനത്തില്‍ പറഞ്ഞു.

25 ാം വാര്‍ഷികത്തോടനുബന്ധിച്ച് നടക്കുന്ന പരിപാടിയില്‍ കേരളത്തില്‍ നിന്നുള്ള പ്രശസ്ത ഗായകരായ ആബിദ് കണ്ണൂര്‍, സജിലി സലീം എന്നിവര്‍ പങ്കെടുക്കും. ഇവരോടൊപ്പം റിയാദിലെ മലയാളി കലാകാരന്മാരും നൃത്ത, സംഗീത, കലാപരിപാടികള്‍ അവതരിപ്പിക്കും. ആഘോഷങ്ങളുടെ ഭാഗമായി സ്ത്രീകള്‍ക്കായി നടത്തുന്ന പുഡ്ഡിങ് ഫെസ്റ്റ് മത്സരം പ്രത്യേക ആകര്‍ഷണമായിരിക്കും. വിജയികള്‍ക്ക് ആകര്‍ഷങ്ങളായ സമ്മാനങ്ങള്‍ നല്‍കും.

തലശ്ശേരിയിലെയും പരിസരങ്ങളിലെയും പാവങ്ങളുടെ കണ്ണീരൊപ്പുന്നതിനും, റിയാദിലെ തലശ്ശേരിക്കാരെ ഒന്നിപ്പിക്കുന്നതിനും കഴിഞ്ഞ 25 വര്‍ഷങ്ങളായി TMWA Riyadh പ്രവര്‍ത്തിച്ചു വരുന്നു. പ്രവാസജീവിതത്തിന്റെ തിരക്കിനും മടുപ്പിനുമിടയില്‍ അംഗങ്ങളുടെ മാനസികവും ശാരീരികവുമായ ഉല്ലാസത്തിനായി വിവിധ കലാ കായിക പരിപാടികള്‍ ഈ സംഘടനയുടെ സംഘടിപ്പിക്കാറുണ്ട്. കുടുംബങ്ങള്‍, ബാച്ചിലര്‍സ്, കുട്ടികള്‍, ബിസിനസ് മേഖലയിലെ പ്രമുഖര്‍, സാമൂഹികപ്രവര്‍ത്തകര്‍ തുടങ്ങിയ ഏകദേശം 750-ഓളം മലയാളികള്‍ പങ്കെടുക്കുമെന്നാണ് പ്രതീക്ഷയെന്നും പ്രവേശനം സൗജന്യമാണെന്നും സംഘാടകര്‍ പറഞ്ഞു.

വാര്‍ത്താസമ്മേളനത്തില്‍ തന്‍വീര്‍ ഹാഷിം (പ്രസിഡന്റ്), ഷമീര്‍ തീക്കുക്കില്‍ (ജന: സെക്രട്ടറി), അഫ്താബ് അമ്പിലായില്‍ (വൈസ് പ്രസിഡന്റ്),
പിസി ഹാരിസ് (ഇവന്റസ് ഹെഡ്), അഷ്‌കര്‍ വിസി (സ്‌പോണ്‍സര്‍ഷിപ് ഹെഡ്), അബ്ദുല്‍ ഖാദര്‍ മോച്ചേരി (സെപ്ഷ്യല്‍ പ്രൊജക്ടസ്) എന്നിവര്‍ പങ്കെടുത്തു.