റിയാദ്: സൗദി അറേബ്യയുടെ പ്രധാന നഗരങ്ങളെ ബന്ധിപ്പിച്ച് രാജ്യത്തിന്റെ ഗതാഗത മേഖലയില്‍ വിപ്ലവം സൃഷ്ടിക്കാന്‍ ലക്ഷ്യമിട്ടുള്ള ചരിത്രപരമായ 'ലാന്‍ഡ് ബ്രിഡ്ജ്' റെയില്‍വേ പദ്ധതിക്ക് തുടക്കമിടാന്‍ സൗദി ഒരുങ്ങുന്നു. 7 ബില്യണ്‍ ഡോളര്‍ നിക്ഷേപത്തലാണ് പദ്ധതി പ്രാവര്‍ത്തികമാക്കുക. റെയില്‍വേ ഗതാഗത വാര്‍ത്താ പോര്‍ട്ടലായ 'റെയില്‍വേ സപ്ലൈ' ആണ് ഈ വിവരങ്ങള്‍ പുറത്തു വിട്ടത്.

ചെങ്കടലിലെ ജിദ്ദയെ റിയാദ് വഴി അറബിക്കടലിലെ ദമാമുമായി ബന്ധിപ്പിക്കുന്ന 1,500 കിലോമീറ്റര്‍ ദൈര്‍ഘ്യമുള്ളതാണ് ഈ പാത. റിയാദിനും ജിദ്ദയ്ക്കും ഇടയിലുള്ള ഏകദേശം 900 കിലോമീറ്റര്‍ ദൂരത്തില്‍ യാത്രാ സമയം നിലവിലെ 12 മണിക്കൂറില്‍ നിന്ന് ട്രെയിനില്‍ 4 മണിക്കൂറില്‍ താഴെയായി കുറയ്ക്കും.

ചരക്ക്, യാത്രാ ഗതാഗതത്തിന് ഒരുപോലെ പിന്തുണ നല്‍കുന്ന ഈ പാത തുറമുഖങ്ങള്‍, ഫാക്ടറികള്‍, ലോജിസ്റ്റിക്സ് ഹബ്ബുകള്‍ എന്നിവയെ ബന്ധിപ്പിക്കുന്ന ഒരു പ്രധാന വ്യാപാര ധമനിയായി മാറും. മേഖലയിലെ ഒരു സുപ്രധാന ലോജിസ്റ്റിക്‌സ് കേന്ദ്രമെന്ന നിലയില്‍ സൗദിയുടെ സ്ഥാനം ഇത് ശക്തിപ്പെടുത്തും. ഗള്‍ഫ്, അറബ് മേഖലകള്‍ക്കായുള്ള ഒരു പ്രധാന ഗതാഗത കേന്ദ്രമാക്കി സൗദിയെ മാറ്റാന്‍ ലക്ഷ്യമിടുന്ന 'സൗദി വിഷന്‍ 2030'ന്റെ അവിഭാജ്യ ഘടകമാണ് ഈ പദ്ധതി.

സൗദി റെയില്‍വേ കമ്പനി നിലവിലുള്ള ദേശീയ റെയില്‍ ശൃംഖലയുടെ ദൈര്‍ഘ്യം 5,300 കിലോമീറ്ററില്‍ നിന്ന് 8,000 കിലോമീറ്ററിലധികം ദൂരത്തേക്ക് വികസിപ്പിക്കാന്‍ ലക്ഷ്യമിടുന്നു. ജിദ്ദ-ദമാം ബന്ധത്തിന് പുറമെ, കിംഗ് അബ്ദുള്ള തുറമുഖത്തെ യാമ്പു ഉള്‍പ്പെടെയുള്ള വ്യാവസായിക നഗരങ്ങളുമായി ബന്ധിപ്പിക്കുന്ന ചരക്ക്, പാസഞ്ചര്‍ ട്രെയിന്‍ സ്റ്റേഷനുകളുടെ ശൃംഖല സ്ഥാപിക്കാനും ഇതുവഴി സാധിക്കും.


മണിക്കൂറില്‍ 200 കിലോമീറ്റര്‍ വരെ വേഗതയില്‍ സഞ്ചരിക്കാന്‍ ശേഷിയുള്ള 15 പുതിയ ട്രെയിനുകള്‍ക്ക് സൗദി റെയില്‍വെ ഓര്‍ഡര്‍ നല്‍കി കഴിഞ്ഞു. പാരിസ്ഥിതിക ഉത്തരവാദിത്തത്തിന് പ്രാധാന്യം നല്‍കിക്കൊണ്ട്, ഹൈഡ്രജന്‍ ഉപയോഗിച്ച് ഓടുന്ന ട്രെയിനുകള്‍ അവതരിപ്പിക്കാനുള്ള പദ്ധതി ശുദ്ധ ഊര്‍ജ്ജത്തിലുള്ള രാജ്യത്തിന്റെ താല്‍പര്യത്തെ എടുത്തു കാണിക്കുന്നു.

വാണിജ്യ റൂട്ടുകള്‍ക്ക് പുറമെ, റിയാദില്‍ നിന്ന് ഖുറയ്യാത്തിലേക്കുള്ള 1,290 കിലോമീറ്റര്‍ ദൈര്‍ഘ്യമുള്ള 'ഡ്രീം ഓഫ് ദ ഡെസേര്‍ട്ട്' എന്ന ആഢംബര ട്രെയിനും സൗദി വികസിപ്പിക്കുന്നുണ്ട്. 2025-ന്റെ രണ്ടാം പാദത്തില്‍ 2.6 ദശലക്ഷത്തിലധികം യാത്രക്കാര്‍ സൗദി റെയില്‍വേകളില്‍ യാത്ര ചെയ്തു. 'ലാന്‍ഡ് ബ്രിഡ്ജ്' യാഥാര്‍ത്ഥ്യമാകുന്നതോടെ വ്യോമ, സമുദ്ര, കര ഗതാഗതങ്ങള്‍ സംയോജിപ്പിച്ചുള്ള ഒരു സമഗ്ര സംവിധാനത്തിന് അടിത്തറയാവുകയും, സൗദി അറേബ്യ മിഡില്‍ ഈസ്റ്റിന്റെ ലോജിസ്റ്റിക്‌സ് ഹൃദയസ്ഥാനമായി മാറുകയും ചെയ്യും.