ജിദ്ദ: സൗദി വെസ്റ്റ് കലാലയം സാംസ്‌കാരിക വേദിക്ക് കീഴില്‍ 'മുഹ്യിദ്ദീന്‍ മാല: ചരിത്രം, ഭാഷ, സാഹിത്യം' എന്ന വിഷയത്തില്‍ ഓണ്‍ലൈന്‍ പഠന സംഗമം നടത്തി. അറബി മലയാള സാഹിത്യത്തിലെ ആദ്യത്തെ കാവ്യമായ മുഹ്യിദ്ദീന്‍ മാലയുടെ ചരിത്രവും , കേരളീയ മുസ്ലിം ചരിത്രങ്ങളില്‍ മാലപ്പാട്ടുകളുടെ സ്വാധീനവും സംഗമത്തില്‍ വിശദീകരിച്ചു.

കേരളം ഫോക്ലോര്‍ അക്കാദമി അവാര്‍ഡ് ജേതാവ് അഷ്റഫ് സഖാഫി പുന്നത് പഠന സംഗമത്തിന് നേതൃത്വം നല്‍കി. രിസാല സ്റ്റഡി സര്‍ക്കിള്‍ സൗദി വെസ്റ്റ് സെക്രട്ടറി സയ്യിദ് ഷബീറലി തങ്ങളുടെ അധ്യക്ഷതയില്‍ നടന്ന സംഗമത്തില്‍ കലാലയം സാസ്‌കാരിക വേദിക്ക് കീഴില്‍ നാഷണല്‍ തലത്തില്‍ 'കലാശാല ' നിലവില്‍ വന്നു. രിസാല സ്റ്റഡി സര്‍ക്കിള്‍ സൗദി വെസ്റ്റ് ജനറല്‍ സെക്രട്ടറി ഉമൈര്‍ മുണ്ടോളി കലാശാല ഭാരവാഹികളെ പ്രഖ്യാപിച്ചു. കലാലയം സെക്രട്ടറി കബീര്‍ ചൊവ്വ സ്വാഗതവും നൗഫല്‍ മദാരി നന്ദിയും പറഞ്ഞു.