ലണ്ടന്‍: യുകെയിലെ നോട്ടിങ്ങാംഷറില്‍നിന്ന് കോട്ടയം സ്വദേശിയെ കാണാതായി സ്റ്റീഫന്‍ ജോര്‍ജ് (47) എന്ന ഗൃഹനാഥനെയാണ് മൂന്ന് ദിവസമായി കാണാതായത്. ഇദ്ദേഹത്തെ കണ്ടെത്താന്‍ സാധിക്കാത്തതിനെത്തുടര്‍ന്ന് പൊതുജന സഹായം തേടി നോട്ടിങ്ങാംഷര്‍ പോലീസ് ഔദ്യോഗിക അറിയിപ്പ് പുറത്തിറക്കി. പീത്സ ഫാക്ടറിയിലെ ജീവനക്കാരനായ സ്റ്റീഫന്‍ ജോര്‍ജ് കഴിഞ്ഞ ഞായറാഴ്ച പതിവുപോലെ സൈക്കിളില്‍ ജോലിക്ക് പോയ ശേഷം വീട്ടില്‍ തിരിച്ചെത്തിയിട്ടില്ല. ബന്ധുക്കളും സുഹൃത്തുക്കളും നടത്തിയ അന്വേഷണങ്ങള്‍ വിഫലമായതിനെത്തുടര്‍ന്നാണ് പോലീസ് ഇപ്പോള്‍ സാമൂഹ്യമാധ്യമങ്ങളിലൂടെ വിവരങ്ങള്‍ പങ്കുവെച്ചിരിക്കുന്നത്. ജോലിയ്ക്ക് എത്താത്തതിനെക്കുറിച്ച് ഫാക്ടറി ജീവനക്കാര്‍ കുടുംബത്തെ അറിയിച്ചതോടെയാണ് സംഭവം പുറത്തറിയുന്നത്. സ്റ്റീഫന്‍ ജോര്‍ജിനെക്കുറിച്ച് എന്തെങ്കിലും വിവരം ലഭിക്കുന്നവര്‍ പോലീസുമായി ബന്ധപ്പെടണമെന്ന് അഭ്യര്‍ഥിച്ചിട്ടുണ്ട്.

വിവരം അറിഞ്ഞയുടന്‍ സുഹൃത്തുക്കളും കുടുംബാംഗങ്ങളും അദ്ദേഹം പോകാന്‍ സാധ്യതയുള്ള എല്ലാ സ്ഥലങ്ങളിലും വ്യാപകമായി തിരച്ചില്‍ നടത്തിയെങ്കിലും സ്റ്റീഫനെക്കുറിച്ച് യാതൊരു തുമ്പും ലഭിച്ചില്ല. തുടര്‍ന്ന്, കുടുംബത്തിന്റെ അപേക്ഷപ്രകാരം കേസ് ഏറ്റെടുത്ത നോട്ടിങ്ങാംഷര്‍ പോലീസ്, സ്റ്റീഫന്‍ ജോര്‍ജിന്റെ ചിത്രവും വിവരങ്ങളും സാമൂഹ്യമാധ്യമ അക്കൗണ്ടുകള്‍ വഴി പങ്കുവെച്ചുകൊണ്ട് പൊതുജനങ്ങളുടെ സഹായം തേടുകയായിരുന്നു. സ്റ്റീഫന്‍ ജോര്‍ജിനെ കണ്ടെത്താന്‍ സഹായിക്കുന്ന എന്തെങ്കിലും വിവരങ്ങള്‍ ലഭിക്കുന്നവര്‍ ഉടന്‍ അറിയിക്കണമെന്ന് പോലീസ് അഭ്യര്‍ഥിച്ചു.