റിയാദ്: സൗദി ഓജര്‍ കമ്പനിയുടെ മുന്‍ ഇന്ത്യന്‍ ജീവനക്കാര്‍ക്ക് ഇനിയും ലഭിക്കാനുള്ള കുടിശ്ശിക ലഭിക്കുന്നതിന് അടിയന്തിരമായി ബന്ധപ്പെടണമെന്ന് റിയാദിലെ ഇന്ത്യന്‍ എംബസി അറിയിച്ചു. സൗദി ഓജര്‍ കമ്പനിയുടെ പാപ്പരത്വ ട്രസ്റ്റി ആയ യൂസഫ് അബ്ദുല്‍റഹ്‌മാന്‍ അല്‍സുബൈലുമായി സഹകരിച്ചാണ് മുന്‍ ഇന്ത്യന്‍ ജീവനക്കാര്‍ക്ക് ആനുകൂല്യങ്ങള്‍ ലഭ്യമാക്കാനുള്ള അവസരം എംബസി വീണ്ടും ഒരുക്കിയിട്ടുള്ളത്. ലഭിക്കാനുള്ള കുടിശ്ശിക തടസങ്ങളില്ലാതെ എത്രയും വേഗം ലഭ്യമാവാന്‍ ഇതു സഹായകരമാവും.

നിങ്ങള്‍ സൗദി ഓജര്‍ കമ്പനിയിലെ മുന്‍ ജീവനക്കാരനാണെങ്കില്‍, അല്ലെങ്കില്‍ അത്തരത്തില്‍ ഒരാളെ നിങ്ങള്‍ക്ക് അറിയാമെങ്കില്‍, അവരുടെ നിലവിലെ കോണ്‍ടാക്റ്റ് വിവരങ്ങള്‍ (മൊബൈല്‍ നമ്പര്‍, ഇമെയില്‍ വിലാസം, ഇപ്പോഴത്തെ താമസ വിലാസം) എന്നിവ ഈ ലിങ്കില്‍ https://ehqaq.sa/saudiogerreq/action/signup/lang/en അപ്‌ഡേറ്റ് ചെയ്യണം. അല്ലെങ്കില്‍ ഇവിടെ നല്‍കിയിട്ടുള്ള ക്യൂആര്‍ കോഡ് സ്‌കാന്‍ ചെയ്തും വിവരങ്ങള്‍ നല്‍കാവുന്നതാണ്.

സൗദി ഓജര്‍ കമ്പനിയിലെ മുന്‍ ഇന്ത്യന്‍ ജീവനക്കാരായ ആയിരത്തോളം പേര്‍ കൃത്യമായ വിവരങ്ങള്‍ നല്‍കാത്തതിനാല്‍ അവര്‍ക്കു ലഭിക്കേണ്ട ആനുകൂല്യങ്ങള്‍ ഇനിയും കൈപ്പറ്റിയിട്ടില്ല. ഈ വിവരങ്ങള്‍ പരമാവധി ഷെയര്‍ ചെയ്ത് അര്‍ഹരായവരിലേക്ക് എത്തിക്കാന്‍ സഹകരിക്കണമെന്ന് എംബസി അഭ്യര്‍ഥിച്ചു.