ബെംഗളൂരു: തായ്ലാന്‍ഡില്‍ നിന്ന് ബെംഗളൂരു വിമാനത്താവളത്തിലിറങ്ങി നാട്ടിലേക്ക് വരുന്നതിനിടെ കാര്‍ ലോറിയുമായി കൂട്ടിയിടിച്ച് വയനാട് സ്വദേശികളായ രണ്ടു പേര്‍ മരിച്ചു. മൂന്നു പേര്‍ക്ക് പരിക്കേറ്റു. കമ്പളക്കാട് മക്കിമല കരിഞ്ചേരി വീട്ടില്‍ ബഷീര്‍ (53), ബഷീറിന്റെ സഹോദരിയുടെ മകന്‍ മുഹമ്മദ് ഷാഫിയുടെ ഭാര്യ ജഷീറ (28) എന്നിവരാണ് മരിച്ചത്. പരിക്കേറ്റ മുഹമ്മദ് ഷാഫി (32), മകന്‍ ഏസം ഹനാല്‍ (3), ബഷീറിന്റെ ഭാര്യ നസീമ (42) എന്നിവരെ മൈസൂരു മണിപ്പാല്‍ ആശുപത്രിയില്‍ പ്രവേശിപ്പിച്ചു.

കൊല്ലേഗല്‍ കോഴിക്കോട് ദേശീയപാതയില്‍ ബേഗൂരിലാണ് അപകടം. ബഷീറും ജഷീറയും തല്‍ക്ഷണം മരിച്ചു. മൃതദേഹം ബേഗൂര്‍ താലൂക്ക് ആശുപത്രിയിലേക്ക് മാറ്റി. പോസ്റ്റ്‌മോര്‍ട്ടത്തിന് ശേഷം നാട്ടിലേക്ക് കൊണ്ടുപോകും.