ദോഹ: ഫിഫ അറബ് കപ്പ് ഖത്തര്‍ 2025നായി, ഖത്തര്‍ എയര്‍വേസ് ഹോളിഡേയ്‌സ് പ്രത്യേക യാത്രാ പാക്കേജുകള്‍ പ്രഖ്യാപിച്ചു. ലോകമെമ്പാടുമുള്ള ഫുട്‌ബോള്‍ ആരാധകര്‍ക്ക് ഈ ടൂര്‍ണമെന്റിന്റെ ആവേശം നേരിട്ട് അനുഭവിക്കാനുള്ള അവസരം ഇതിലൂടെ ലഭിക്കും. ഫിഫ വേള്‍ഡ് കപ്പ് 2022ഉം ഏഷ്യ കപ്പ് 2023ഉം വിജയകരമായി സംഘടിപ്പിച്ചതിന് ശേഷം, ഖത്തറിലെ മറ്റൊരു പ്രധാന ഫുട്‌ബോള്‍ ആഘോഷമായിരിക്കും ഫിഫ അറബ് കപ്പ് 2025. ടൂര്‍ണമെന്റ് ഡിസംബര്‍ 1 മുതല്‍ 18 വരെ നടക്കും. അറബ് ലോകത്തെ 16 ടീമുകള്‍ പങ്കെടുക്കും.

യാത്രാ പാക്കേജുകളില്‍ ഖത്തര്‍ എയര്‍വേസ് വിമാനയാത്ര, 4-5 സ്റ്റാര്‍ ഹോട്ടലുകളിലെ താമസം, മല്‍സര ടിക്കറ്റുകള്‍, എയര്‍പോര്‍ട്ട് ട്രാന്‍സ്ഫര്‍ തുടങ്ങിയ സൗകര്യങ്ങള്‍ ഉള്‍പ്പെടും. ആരാധകര്‍ക്ക് സ്വന്തം ഇഷ്ട ടീമിനെ പിന്തുണയ്ക്കാനും ഖത്തറിന്റെ സാംസ്‌കാരിക അനുഭവങ്ങള്‍ ആസ്വദിക്കാനും കഴിയും. കൂടുതല്‍ വിവരങ്ങള്‍ qatarairways.com/fifaarabcup25ല്‍ ലഭ്യമാണ്.

ഖത്തര്‍ സ്‌പോര്‍ട്‌സിനെയും ഹോസ്പിറ്റാലിറ്റിയെയും ഒരുമിപ്പിക്കുന്ന ലോക നേതൃത്വം തുടരുകയാണെന്നും അറബ് കപ്പ് 2025 ലോകമെമ്പാടുമുള്ള ആരാധകരെ വീണ്ടും ഖത്തറിലേക്ക് ആകര്‍ഷിക്കുമെന്നും ഖത്തര്‍ എയര്‍വേസ് ഗ്രൂപ്പ് സിഇഒ എഞ്ചിനീയര്‍ ബദര്‍ മുഹമ്മദ് അല്‍ മീര്‍ പറഞ്ഞു.