ദോഹ: മുഖ്യമന്ത്രി പിണറായി വിജയന് ഒരു ദിവസത്തെ സന്ദര്ശനത്തിനായി ഖത്തറില് എത്തി. രാവിലെ 6:10ന് ദോഹ രാജ്യാന്തര വിമാനത്താവളത്തില് എത്തിയ അദ്ദേഹത്തെ ഖത്തര് ഇന്ത്യന് അംബാസഡറും ലോക കേരള സഭാംഗങ്ങളും ചേര്ന്ന് സ്വീകരിച്ചു. വൈകുന്നേരം അബു ഹമൂറിലെ ഐഡിയല് ഇന്ത്യന് സ്കൂളില് നടക്കുന്ന 'മലയാളോത്സവം 2025' മുഖ്യമന്ത്രി ഉദ്ഘാടനം ചെയ്യും. ഫിഷറീസ്, സാംസ്കാരിക വകുപ്പ് മന്ത്രി സജി ചെറിയാനും പ്രമുഖ വ്യവസായി ഡോ. എം.എ. യൂസഫ് അലിയും ഉള്പ്പെടെ നിരവധി പ്രമുഖര് ചടങ്ങില് പങ്കെടുക്കും.
ദോഹ വിമാനത്താവളത്തില് ഇന്ത്യന് അംബാസഡര് വിപുല്, ലോക കേരള സഭാംഗങ്ങള്, നോര്ക്ക റൂട്ട്സ് ഡയറക്ടര് സി.വി. റപ്പായി, പ്രവാസി വെല്ഫെയര് ബോര്ഡ് അംഗം ഇ.എം. സുധീര്, ഖത്തര് സംസ്കൃതി പ്രസിഡന്റ് സാബിത് സഹീര്, സെക്രട്ടറി ഷംസീര് അരിക്കുളം എന്നിവരും മറ്റ് പ്രമുഖരും ചേര്ന്നാണ് മുഖ്യമന്ത്രിയെ സ്വീകരിച്ചത്.
കേരളത്തിന്റെ സാംസ്കാരിക തനിമ വിളിച്ചോതുന്ന പവലിയനുകളും കലാപരിപാടികളും സമ്മേളന നഗരിയില് ഒരുക്കിയിട്ടുണ്ട്. ഖത്തറിലെ പ്രവാസി സംഘടനാ പ്രതിനിധികള്, മലയാളി വ്യവസായികള് എന്നിവരുമായുള്ള കൂടിക്കാഴ്ചകളും സന്ദര്ശനത്തിന്റെ ഭാഗമായി നിശ്ചയിച്ചിട്ടുണ്ട്. രാത്രി ഖത്തര് ചേംബര് ഓഫ് കൊമേഴ്സ് ഒരുക്കുന്ന വിരുന്നില് പങ്കെടുത്ത ശേഷം മുഖ്യമന്ത്രി കേരളത്തിലേക്ക് മടങ്ങും. കഴിഞ്ഞ 12 വര്ഷത്തിനിടെ ഒരു കേരള മുഖ്യമന്ത്രി ഖത്തര് സന്ദര്ശിക്കുന്നത് ഇത് ആദ്യമായാണ്.
Related News
