റിയാദ്: ഇന്ത്യന്‍ എംബസി സംഘടിപ്പിക്കുന്ന ''പ്രവാസി പരിചയ് 2025'' സാംസ്‌കാരിക മഹോത്സവത്തിന്റെ രണ്ടാം ദിനം ആത്മീയതയും സംഗീതവും ചേര്‍ന്ന സൂഫി സംഗീതം അതുല്യമായ അനുഭവമായി. ഈ വര്‍ഷത്തെ മൂന്നാം പതിപ്പ് ഒക്ടോബര്‍ 28 മുതല്‍ നവംബര്‍ 3 വരെ വിവിധ പരിപാടികളോടെ നടന്നു വരികയാണ്.

2023ല്‍ സൗദി അറേബ്യയിലെ ഇന്ത്യന്‍ പ്രവാസി സംഘടനകളുടെ സഹകരണത്തോടെ ആരംഭിച്ച പ്രവാസി പരിചയ്, ഇന്ത്യയുടെ സമ്പന്നവും വൈവിധ്യമാര്‍ന്ന സാംസ്‌കാരിക പൈതൃകത്തെ പ്രദര്‍ശിപ്പിക്കുന്ന പ്രധാന വേദിയായി മാറിയിരിക്കുന്നു.

സംസ്ഥാനങ്ങളുടേതായ തീം ദിനങ്ങള്‍, നൃത്തം, സംഗീതം, ജനകീയ കലാരൂപങ്ങള്‍, പരമ്പരാഗത ഭക്ഷണങ്ങള്‍ എന്നിവയുടെ മുഖേന ഇന്ത്യയുടെ ഏകതയില്‍ വൈവിധ്യം എന്ന മൂല്യം ശക്തമായി പ്രതിപാദിക്കുന്നതാണ് ഓരോ ദിനങ്ങളും.

രണ്ടാം ദിനത്തില്‍ നടന്ന ''മെഹ്ഫില്‍-എ-സമാ'' എന്ന കവ്വാലി സംഗീതസന്ധ്യയാണ് പ്രേക്ഷകരെ ആകര്‍ഷിച്ചത്. ഇന്ത്യയില്‍ നിന്നെത്തിയ പ്രശസ്ത സംഗീതജ്ഞന്‍ ഷാഹിദ് സാമി നിയാസി ബ്രദേഴ്‌സ് നയിച്ച സൂഫി സംഗീതം ഹൃദ്യമായിരുന്നു. ഈ പരിപാടി പ്രവാസി പരിചയ് ഉദ്ദേശിക്കുന്ന സാംസ്‌കാരിക വൈവിധ്യവും ഇന്ത്യയും പ്രവാസി സമൂഹവും തമ്മിലുള്ള അണമുറിയാത്ത ബന്ധവും മനോഹരമായി പ്രതിഫലിപ്പിക്കുന്നതായിരുന്നു.

അതോടൊപ്പം, ''ഭാരത് കോ ജാനിയേ'' (ഇന്ത്യയെ അറിയുക) എന്ന ക്വിസ് മത്സരവും എംബസി സംഘടിപ്പിച്ചു. റിയാദിലെ ഒമ്പത് ഇന്ത്യന്‍ സ്‌കൂളുകളില്‍ നിന്നുള്ള വിദ്യാര്‍ത്ഥികള്‍ ആവേശപൂര്‍വ്വം പങ്കെടുത്ത ഈ മത്സരത്തില്‍, ഇന്ത്യയുടെ ചരിത്രം, ഭൂമിശാസ്ത്രം, പൈതൃകം, സംസ്‌കാരം തുടങ്ങിയ വിഷയങ്ങളില്‍ മികച്ച അറിവ് അവര്‍ തെളിയിച്ചു.മത്സരവിജയികളെ ഇന്ത്യന്‍ അംബാസഡര്‍ ഡോ. സുഹൈല്‍ അജാസ് ഖാന്‍ പ്രത്യേക ചടങ്ങില്‍ ആദരിച്ചു.

ഫോട്ടോ: 1. ഷാഹിദ് സാമി നിയാസി ബ്രദേഴ്‌സ് നയിച്ച സൂഫി സംഗീതം. 2. ക്വിസ് മത്സര വിജയികള്‍ക്ക് അംബാസഡര്‍ ഡോ. സുഹൈല്‍ അജാസ് ഖാന്‍ സമ്മാനങ്ങള്‍ വിതരണം ചെയ്യുന്നു.