തിരുവനന്തപുരം: കേരളത്തിന് മൂന്നാമത്തെ വന്ദേ ഭാരത് ട്രെയിൻ അനുവദിക്കാൻ കേന്ദ്ര സർക്കാർ തീരുമാനിച്ചു. എറണാകുളം - ബെംഗളൂരു റൂട്ടിലായിരിക്കും പുതിയ സർവീസ്. നവംബർ പകുതിയോടെ സർവീസ് ആരംഭിക്കുമെന്നാണ് വിവരം. ഐടി മേഖലയിൽ ജോലി ചെയ്യുന്നവർക്ക് ഇത് വലിയ ആശ്വാസമാകും. നിലവിൽ ഉത്സവ സീസണിലും വിശേഷ ദിവസങ്ങളിലും ബെംഗളൂരുവിലേക്കുള്ള യാത്രയ്ക്ക് വലിയ തിരക്കാണ് അനുഭവപ്പെടുന്നത്. ബസുകൾ അമിത നിരക്ക് ഈടാക്കുന്നതും ഒരു പ്രശ്നമാണ്. പുതിയ വന്ദേ ഭാരത് ട്രെയിൻ വരുന്നതോടെ ഈ പ്രശ്നങ്ങൾക്ക് പരിഹാരമാകുമെന്നാണ് പ്രതീക്ഷ.

സാധാരണയായി വന്ദേ ഭാരത് ട്രെയിനുകളിൽ 16 കോച്ചുകളാണ് ഉണ്ടാകുന്നത്. എക്സിക്യൂട്ടീവ് ചെയർ കാറും, ചെയർ കാറും ഉൾപ്പെടെ ഏകദേശം 1100 പേർക്ക് ഒരേസമയം യാത്ര ചെയ്യാം. എന്നാൽ, എറണാകുളം - ബെംഗളൂരു വന്ദേ ഭാരത് ട്രെയിനിൽ എത്ര കോച്ചുകൾ ഉണ്ടാകുമെന്ന കാര്യത്തിൽ ഔദ്യോഗിക സ്ഥിരീകരണം ലഭിച്ചിട്ടില്ല.