കണ്ണൂർ: പയ്യാമ്പലത്ത് കടലിൽ കുളിക്കാനിറങ്ങിയ മൂന്ന് മെഡിക്കൽ വിദ്യാർത്ഥികൾ മുങ്ങിമരിച്ചു. കർണാടക സ്വദേശികളായ അഫ്നാൻ, റഹാനുദ്ദീൻ, അഫ്റാസ് എന്നിവരാണ് മരിച്ചത്. 22 കാരായ ഇവർ മംഗലാപുരത്തെ കനച്ചൂർ മെഡിക്കൽ കോളേജിലെ വിദ്യാർത്ഥികളാണ്.

എട്ടംഗ സംഘം പയ്യാമ്പലത്തെ ഒരു റിസോർട്ടിൽ താമസിച്ചുവരികയായിരുന്നു. രാവിലെ എട്ടംഗസംഘം കടലിൽ കുളിക്കാനിറങ്ങുകയും, ഇതിനിടെ മൂന്നുപേർ തിരയിൽപ്പെടുകയുമായിരുന്നു. അപകടത്തിൽപ്പെട്ടവർക്ക് ഉടൻ സഹായമെത്തിക്കാൻ സാധിച്ചില്ല. പിന്നീട് അഗ്നിരക്ഷാസേനയും സ്കൂബ ഡൈവേഴ്സും എത്തിയാണ് തിരച്ചിൽ നടത്തിയത്. മൂന്നുപേരെയും കരയ്ക്കെത്തിച്ചെങ്കിലും മരണം സംഭവിച്ചിരുന്നു. മൃതദേഹങ്ങൾ പോസ്റ്റ്മോർട്ടത്തിനായി ആശുപത്രിയിലേക്ക് മാറ്റി. സംഭവത്തിൽ പോലീസ് അന്വേഷണം ആരംഭിച്ചു.