സംസ്ഥാനത്തിന്റെ സാമ്പത്തിക വളര്‍ച്ചയ്ക്ക് ഗണ്യമായ സംഭാവന നല്‍കിയ പ്രവാസി സമൂഹത്തോടുള്ള പ്രതിബദ്ധതയുടെ ഭാഗമായി സാമ്പത്തികമായി പിന്നോക്കം നില്‍ക്കുന്ന പ്രവാസി മലയാളികളുടെ മക്കള്‍ക്കും തിരികെയെത്തിയ പ്രവാസികളുടെ മക്കള്‍ക്കും ഉന്നത വിദ്യാഭ്യാസത്തിനു ആവശ്യമായ സാമ്പത്തിക സഹായം നല്‍കുന്നതിനായി പ്രവാസി മലയാളികളായ നോര്‍ക്കാ റൂട്ട്‌സ് ഡയറക്ടര്‍മാരും നോര്‍ക്ക വകുപ്പും ചേര്‍ന്ന് നടപ്പിലാക്കിയിരിക്കുന്ന പദ്ധതിയാണ് നോര്‍ക്ക റൂട്ട്‌സ് ഡയറക്ടേഴ്‌സ് സ്‌കോളര്‍ഷിപ്പ് പദ്ധതി.

യോഗ്യതകള്‍
കുറഞ്ഞത് രണ്ട് വര്‍ഷമായി വിദേശത്ത് ജോലി ചെയ്യ്തിട്ടുള്ള താഴ്ന്ന വരുമാനക്കാരായ പ്രവാസി കേരളീയരുടെ (വാര്‍ഷിക വരുമാനം 3 ലക്ഷം വരെയുള്ള) മക്കള്‍ക്കും, (വാര്‍ഷിക വരുമാനം 3 ലക്ഷം വരെയുള്ള) തിരികെ എത്തിയ പ്രവാസികളുടെ കുട്ടികളുമാണ് ഈ പദ്ധതിയുടെ അനൂകൂല്യം ലഭിക്കുന്ന ഗുണഭോക്താക്കള്‍.

ഒരു പ്രവാസിയുടെ രണ്ടു കുട്ടികള്‍ക്ക് വരെ ഈ പദ്ധതിയിന്‍ കീഴില്‍ സ്‌കോളര്‍ഷിപ്പ് നല്‍കുന്നതാണ്.

സ്‌കോളര്‍ഷിപ്പ് പദ്ധതി സംബന്ധിച്ച വിശദാംശങ്ങള്‍:
ഈ പദ്ധതിയുടെ അനൂകൂല്യം ലഭിക്കുന്നതിനുള്ള അധികാരപരിധിയില്‍പെടുന്നത് പ്രൊഫഷണല്‍ ബിരുദത്തിനും ബിരുദാനന്തര തലത്തിലും നിര്‍ദിഷ്ട കോഴ്‌സുകളില്‍ ആദ്യ വര്‍ഷം പഠിക്കുന്ന തെരഞ്ഞെടുക്കപ്പെടുന്ന അപേക്ഷകരാണ്. തൊഴില്‍ മേഖലകളിലുള്ള അപേക്ഷകര്‍ ഈ പദ്ധതിയുടെ പരിധിയില്‍ ഉള്‍പ്പെടുന്നതല്ല. പഠിക്കുന്ന കോഴ്‌സിനുവേണ്ട യോഗ്യത പരീക്ഷയില്‍ (യൂണിവേഴ്‌സിറ്റി /ബോര്‍ഡ് പരീക്ഷയില്‍) ലഭിക്കുന്ന മാര്‍ക്കിന്റെ അടിസ്ഥാനത്തിലാണ് സ്‌കോളര്‍ഷിപ്പ് നല്‍കുക.

പഠിക്കുന്ന കോഴ്‌സിനുവേണ്ട നിശ്ചിത യോഗ്യത പരീക്ഷയില്‍ കുറഞ്ഞത് 60 ശതമാനം മാര്‍ക്ക് കരസ്ഥമാക്കിയവര്‍ക്കായിരിക്കും സ്‌കോളര്‍ഷിപ്പിന് അപേക്ഷിക്കുന്നതിനുള്ള അര്‍ഹത. കേരളത്തിലെ സര്‍വ്വകലാശാലകള്‍ അംഗീകരിച്ച കോഴ്‌സുകള്‍ക്കും അംഗീകൃത വിദ്യാഭ്യാസ സ്ഥാപനങ്ങളില്‍ റെഗുലര്‍ കോഴ്‌സുകള്‍ക്ക് പഠിക്കുന്നവര്‍ക്കുമായിരിക്കും സ്‌കോളര്‍ഷിപ്പ് നല്‍കുന്നത്. ഒരാള്‍ക്ക് വിദ്യാഭ്യാസകാലത്ത് ഒരു പ്രാവശ്യം മാത്രമേ സ്‌കോളര്‍ഷിപ്പിന് അര്‍ഹതയുണ്ടായിരിക്കുകയുള്ളൂ

തുല്യമായ മാര്‍ക്കോ ഗ്രേഡോ വരികയും അതില്‍ ഒരാളെ മാത്രം തെരഞ്ഞെടുക്കേണ്ട സാഹചര്യം വരുകയും ചെയ്യുന്ന പക്ഷം വരുമാനം കുറഞ്ഞയാള്‍ക്കായിരിക്കും മുന്‍ഗണന.

വരുമാനവും/ മാര്‍ക്ക് / ഗ്രേഡ് തുല്യമായി വരുകയാണെങ്കില്‍,യോഗ്യത കോഴ്‌സിന്റെ പ്രധാന വിഷയത്തില്‍ ലഭിച്ച മാര്‍ക്കിനെ അടിസ്ഥാനപ്പെടുത്തിയിരിക്കും മുന്‍ഗണന നിശ്ചയിച്ചിരിക്കുന്നത്. നോര്‍ക്ക റൂട്ട്‌സ് സ്‌കോളര്‍ഷിപ്പ് പദ്ധതിയുടെ മാനദണ്ഡം മെരിറ്റ് മാത്രമായിരിക്കും.
വിവിധ കോഴ്‌സുകളിലെ സ്‌കോളര്‍ഷിപ്പിന് അര്‍ഹരായവരുടെ എണ്ണവും അപേക്ഷകരുടെ എണ്ണവും അനുസരിച്ച് ആകെ നല്‍കുന്ന സ്‌കോളര്‍ഷിപ്പുകളുടെ എണ്ണത്തില്‍ വ്യതിയാനം വരുത്താതെ പുനര്‍ക്രമീകരിക്കുന്നതിന് നോര്‍ക്ക -റൂട്ട്‌സ് ചീഫ് എക്‌സിക്യൂട്ടീവ് ഓഫീസര്‍ക്ക് അധികാരമുണ്ടായിരിക്കുന്നതാണ്

തെറ്റായ വിവരങ്ങളോ രേഖകളോ ഹാജരാക്കുന്ന അപേക്ഷകരെ ഈ പദ്ധതിയുടെ അനൂകൂല്യം ലഭിക്കുന്നതിന് പരിഗണിക്കുന്നതല്ല. തെറ്റായ വിവരങ്ങളോ രേഖകളോ ഹാജരാക്കിയാണ് അനൂകൂല്യം കൈപറ്റിയതെന്ന് ബോധ്യപ്പെടുന്നപക്ഷം ടി അപേക്ഷകരില്‍ നിന്നും തുക 15 ശതമാനം പലിശ സഹിതം തിരിച്ചടിക്കുന്നതിന് നടപടി സ്വീകരിക്കുന്നതാണ്. അങ്ങനെയുള്ള അപേക്ഷകരെ ഭാവിയില്‍ ഇതുപോലെയുള്ള ധനസഹായം കൈപറ്റുന്നതില്‍ നിന്നും മാറ്റി നിര്‍ത്തുന്നതാണ്.

തെരഞ്ഞെടുക്കപ്പെടുന്ന ഗുണഭോക്താക്കളുടെ സേവിങ്‌സ് ബാങ്ക് അക്കൗണ്ട് മുഖേനയാണ് സ്‌കോളര്‍ഷിപ്പ് തുക വിതരണം ചെയ്യുന്നത്
ഓരോ കോഴ്സ്സിനും 15000/ രൂപയായിരിക്കും സ്‌കോളര്‍ഷിപ് തുക.