ജിദ്ദ- സൗദി അറേബ്യ 2026ലെ ഹജ് തീര്ത്ഥാടകര്ക്കായി ഒരുക്കുന്ന മികച്ച സൗകര്യങ്ങള് നേരില് കാണുന്നതിന്റെ ഭാഗമായി കേന്ദ്രമന്ത്രി കിരണ് റിജിജു ജിദ്ദയിലെ ഹറമൈന് അതിവേഗ റെയില്വേ സ്റ്റേഷന് സന്ദര്ശിച്ചു. സന്ദര്ശനത്തിന്റെ ഭാഗമായി, ജിദ്ദയില്നിന്ന് മക്കയിലേക്കുള്ള ട്രെയിനില് അദ്ദേഹം ഒരു ചെറിയ യാത്ര നടത്തുകയും പൊതുവായ സാഹചര്യങ്ങള് വിലയിരുത്തുകയും ചെയ്തു. ഹജ് തീര്ത്ഥാടകര്ക്ക് തടസ്സങ്ങളില്ലാത്ത യാത്രാസൗകര്യങ്ങള് ഉറപ്പാക്കുന്നതിന് സൗദി ഒരുക്കിയ സൗകര്യങ്ങള് മനസ്സിലാക്കുകയായിരുന്നു സന്ദര്ശനത്തിന്റെ പ്രാഥമിക ലക്ഷ്യം.
സൗദി അറേബ്യയില് നടക്കുന്ന 2026-ലെ ഹജ്, ഉംറ സമ്മേളനത്തില് ഇന്ത്യന് പ്രതിനിധി സംഘത്തെ നയിച്ചെത്തിയതായിരുന്നു അദ്ദേഹം. സമ്മേളനത്തിനെത്തിയ റിജിജുവിന് വന്വരവേല്പാണ് ലഭിച്ചത്.
